ەلوردادا 20 دان استام ەلدىڭ ءدىن وكىلدەرى باس قوسادى

ەلوردادا الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XXI وتىرىسى وتەدى. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى Kazinform اگەنتتىگى.

«2023-جىلعى 11- قازاندا استانادا بەيبىتشىلىك جانە كەلىسىم سارايىندا سەنات ءتوراعاسى، الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى ماۋلەن اشىمبايەۆتىڭ توراعالىعىمەن الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XXI وتىرىسى وتەدى. سەزد جۇمىسىنا يسلام، حريستيان، بۋدديزم، يۋدايزم، يندۋيزم، داوسيزم، سينتويزم، باحاي، سونداي-اق الەمنىڭ 20 دان استام ەلىنەن كەلگەن حالىقارالىق جانە ءدىني ۇيىمدار وكىلدەرىنىڭ الەمدىك جانە ءداستۇرلى دىندەردىڭ رۋحاني كوشباسشىلارى قاتىسادى دەپ كۇتىلۋدە»، - دەدى ايبەك سمادياروۆ مينيسترلىكتەگى بريفينگتە.

ونىڭ اتاپ وتۋىنشە، حاتشىلىق وتىرىسى اياسىندا الەمدىك جانە ءداستۇرلى دىندەر ليدەرلەرىنىڭ VII سەزىنىڭ يدەيالارى مەن قورىتىندى دەكلاراتسياسىن ىلگەرىلەتۋ ماسەلەلەرىن تالقىلاۋ، سونداي- اق الەمدىك جانە ءداستۇرلى دىندەر ليدەرلەرى سەزىنىڭ 2023-2033-جىلدارعا ارنالعان دامۋ تۇجىرىمداماسىن قاراۋ جانە قابىلداۋ جوسپارلانعان.