ەلورداعا ەردوعان كەلە جاتىر
شاڭحاي ىنتىماقتاستىق ۇيىمىنىڭ سامميتىنە باقىلاۋشى ەلدەر مەن ديالوگ بويىنشا سەرىكتەس مەملەكەتتەردىڭ باسشىلارى دا قاتىسادى دەپ جوسپارلانىپ وتىر.
سولاردىڭ ءبىرى - تۇركيا پرەزيدەنتى رەجەپ تايپ ەردوعان. ءيا، تۇركيا پرەزيدەنتى رەجەپ تايپ ەردوعاننىڭ شىلدە ايىنداعى شەتەلگە جاسايتىن ساپارى بەلگىلى بولدى. تۇرىك اقپارات قۇرالدارىنىڭ مالىمدەۋىنشە، تۋىستاس ەلدىڭ مەملەكەت باسشىسى قازاقستان، ءازىربايجان، امەريكا جانە سولتۇستىك كيپر تۇرىك رەسپۋبليكاسىنا ساپارلاي بارىپ، ش ى ۇ، تم ۇ جانە ناتو سامميتىنە قاتىسادى. العاشقى ساپارى استاناعا. ەلوردادا ەردوعان شاڭحاي ىنتىماقتاستىق ۇيىمىنا مۇشە ەلدەردىڭ مەملەكەت جانە ۇكىمەت باسشىلارى سامميتىنە بوي كورسەتەدى.
تۇركيا سىرتقى ىستەر ءمينيسترىنىڭ سوزىنشە، ەردوعان سامميت اياسىندا وزگە ەل باسشىلارىمەن كەزدەسۋى جوسپارلانعان. جالپى تۇركيا شاڭحاي ىنتىماقتاستىق ۇيىمىنىڭ 14 ديالوگ سەرىكتەسىنىڭ ءبىرى. ديالوگ بويىنشا سەرىكتەستىك، تۇركيا مەن ش ى ۇ اراسىنداعى ءارتۇرلى ماسەلەلەر، اسىرەسە ايماقتىق قاۋىپسىزدىك، تەرروريزممەن كۇرەس، ەسىرتكى بيزنەسى مەن ۇيىمداسقان قىلمىستىڭ الدىن الۋ، سونداي- اق ەكونوميكالىق جانە مادەني سالالارداعى ىنتىماقتاستىقتى دامىتۋدى كوزدەيدى. تۇركيا ءۇشىن ۇيىمنىڭ ماڭىزدىعىن مامانداردان سۇراپ كورگەن ەدىك.
فاتيح كوجاوعلۇ، دوكتور، ساياساتتانۋشى:
- الەمدە بولىپ جاتقان جاھاندىق وزگەرىستەرگە ءبارىمىز كۋا بولىپ وتىرمىز. ءبىرقاتار وڭىرلەردە قاقتىعىستار جالعاسۋدا. بۇل شيەلەنىستەردىڭ ناتيجەسىنە جاڭا الەمدىك گەوساياسي جانە ەكونوميكالىق بالانس قالىپتاسادى. تۇركيا جانە تۇركى دۇنيەسى بۇل قاقتىعىستاردىڭ تاراپتارى ەمەس. دەسە دە، جاڭا گەوساياساتتا بەيبىتشىلىككە ۇلەس قوسا الادى. وسى تۇرعىدان، شانحاي ىنتىماقتاستىق ۇيىمى، ب ر ي ك س، «G7» سەكىلدى حالىقارالىق ۇيىمدارمەن ديالوگتا بولۋدى ماڭىزدى دەپ ەسەپتەيمىن.
ەلنۋر حاسان ميكايل، حالىقارالىق قاتىناستار پروفەسسورى:
- شاڭحاي ىنتىماقتاستىق ۇيىمى تۇركى الەمى تۇرعىسىنان ماڭىزدى. تۇركيا، حالىقارالىق ۇيىمنىڭ ديالوگ سەرىكتەسى. تۇركيا، مۇشە بولۋى باسقا دا باۋىرلاس مەملەكەتتەرمەن ءبىر ۇيىمدا بولۋىن بىلدىرەدى. ارينە، پايداسى زور. دەسە دە، مۇشە بولۋىن مەملەكەت باسشىلارىمىز شەشەدى. بىلتىر سامارحاندا وتكەن سامميتتە ەردوعان تۇركيانىڭ شاڭحاي ىنتىماقتاستىق ۇيىمىنا مۇشە بولعىسى كەلەتىنىن مالىمدەگەن بولاتىن.