ەلوردا ورتالىق ساياباعى حالىقارالىق بايقاۋدا ۇزدىك دەپ تانىلدى

استانا. KAZINFORM - «حرۋستالنوە كولەسو» حالىقارالىق بايقاۋىندا استانانىڭ ورتالىق ساياباعى ەڭ ۇزدىك اشىق ويىن-ساۋىق جانە دەمالىس ساياباعى دەپ تانىلدى.

ەلوردا اكىمدىگى رەسمي سايتىنىڭ حابارلاۋىنشا، بايقاۋ رەسەيدىڭ سوچي كۋرورتىنداعى ويىن-ساۋىق جانە دەمالىس يندۋسترياسى ماماندارىنىڭ 33- فورۋمى اياسىندا وتكەن. استانالىق ساياباقتىڭ باستى باسەكەلەسى ماسكەۋ ويىن-ساۋىق ساياباعى بولدى.

«ءبىز بۇل ءىس-شاراعا ماۋسىمنىڭ باسىنان بەرى دايىندالدىق. ەلوردامىزدى لايىقتى تانىستىرۋ ءۇشىن كوماندامىزبەن ساياباقتا جاڭا، قىزىقتى شەشىمدەر مەن ىسكە اسىرىلعان يدەيالار جەتكىلىكتى دەپ ويلادىق»، - دەدى «MAGIC PARK ASTANA» ورتالىق ساياباعىنىڭ باسقارۋشى كومپانياسىنىڭ ديرەكتورى گايني حاسەنوۆ.

قازىلار القاسى ساياباقتى باسقارۋدىڭ 6 جىلىندا جۇزەگە اسىرىلعان تۇجىرىمدامالىق شەشىمدەردى باعالادى: ويىن-ساۋىق ايماقتارىن تاقىرىپتاۋ؛ اتتراكسيونداردى وتباسىلىق- بالالار جانە ەكسترەمالدى اتتراكسيوندار ايماعىنا ءبولۋ؛ گاسترواللەيا.

سونداي-اق ولار ساياباقتىڭ ورنالاسقان جەرىن دە اتاپ ءوتتى. ويتكەنى ادەتتە ساياباقتار ادامدار كوپ جينالاتىن جەرلەردە ورنالاسقان، ال مۇندا ساياباق كەلۋشىلەردى وزىنە تارتتى.

بيىل ورتالىق ساياباقتا جاڭا اتتراكتسيوندار «جەتىنشى اسپان» جانە «ەكستريم» ۇلكەن ماياتنيك قولدانىسقا بەرىلدى. ءبىراق كەلۋشىلەر ءۇشىن ەڭ قىزىقتىسى ساياباقتىڭ جاسىل ايماعىندا وتەتىن جانە اققۋ توعانىنا قارايتىن بيىك مونورەلستى جاڭا «اۋە ساياحاتى» اتتراكسيونى بولدى.

اۆتور

ابىلايحان جۇماشيەۆ