ەلوردا «ۆەنەتسياعا» اينالدى
استانا. KAZINFORM - كەشە كەشتە ەكى كۇن قاتارىنان تولاسسىز جاۋعان جاۋىننان كەيىن استانا كوشەلەرى سۋ استىندا قالدى. جەرگىلىكتى تۇرعىندار الەۋمەتتىك جەلىلەردە قالانىڭ درەناج جۇيەسىنە نارازى ەكەنىن جارىسا جازىپ جاتىر.
جاۋىن سالدارىنان كەپتەلىس بولىپ، كولىك يەلەرى دىتتەگەن جەرىنە كەشىگىپ جەتۋدە. ايالدامادا قوعامدىق كولىك كۇتكەن جولاۋشىلاردىڭ قاراسى قالىڭ. ءتىپتى، جاياۋ جۇرگىنشىلەر جولاعىنىڭ ءوزى كولشىككە اينالىپ وتىر. «ارىق سالماي ما؟» دەگەن تۇرعىنداردىڭ شاھار بيلىگىنە دەگەن وكپەسى قارا قازانداي.
قولايسىز اۋا رايىنا بايلانىستى اۆياكومپانيالار جولاۋشىلارعا رەيستەر كەشىكتىرىلۋى مۇمكىن ەكەنىن ەسكەرتتى.
استانالىقتار الەۋمەتتىك جەلىلەرگە جاۋىن سالدارىنان تاپ بولعان قيىندىقتارىن ايتىپ، ءتۇرلى فوتوسۋرەتتەر مەن بەينەجازبالاردى جۇكتەپ جاتىر.
ايتا كەتەيىك، كەشە، 8 -تامىزدا استاناعا بۇرشاق جاۋىپ، اۋەجايداعى ءتورت ۇشاقتى زاقىمداعان بولاتىن.
استانادا ەكى كۇندە 1,5 ايلىق مولشەردەن اساتىن جاۋىن جاۋدى. جاڭبىردىڭ سوڭى ءىرى بۇرشاققا ۇلاستى. وسىعان وراي قالا اكىمدىگى ەسكەرتۋ جاسادى.
قازگيدرومەت مالىمەتىنشە، ەكى كۇن ىشىندە استانادا 48 م م جاڭبىر جاۋعان، ايلىق نورما - 31 م م. قالا بويىنشا 200-دەن استام ارنايى تەحنيكا جۇمىلدىرىلدى، ولار جەرگىلىكتى ورىنداردا سۋ سورۋ جۇمىسىن جۇرگىزدى. تولاسسىز جاڭبىرعا بايلانىستى ءبىرقاتار كوشەدە كولىك قوزعالىسى شەكتەلگەن. قالا تۇرعىندارى مۇنداي قولايسىز اۋا رايىندا سىرتقا شىقپاعانى ءجون.
ايتا كەتەيىك، كوممۋنالدىق قىزمەتتەر كوللەكتورلار مەن جاڭبىر قابىلداعىشتاردى تازارتۋ، قۇبىرلاردى بۋلاۋ، سۋ بۇرۋ، نوسەرلى كارىز جۇيەلەرى مەن تازارتۋ قۇرىلىسىن سالۋ جانە باسقا جۇمىس جۇرگىزدى.