ەلوردا كۇنىنە وراي استانادا اسىق اتۋدان تۋرنير وتەدى

الماتى. قازاقپارات – 4-شىلدە كۇنى استانا قالاسىنىڭ دەنە شىنىقتىرۋ جانە سپورت باسقارماسىنىڭ ۇيىمداستىرۋىمەن ەلوردانىڭ كورىكتى ورنى - «عاشىقتار» ساياباعىندا «استانا ساقاسى» قالالىق تۋرنيرى وتەدى، دەپ حابارلايدى ەلوردا اكىمدىگىنىڭ رەسمي سايتى.

ءداستۇرلى ۇلتتىق ويىنعا نەگىزدەلگەن بۇل تۋرنير استانا كۇنى مەرەكەسىنە ارنالىپ، ەرەسەكتەر، جاستار جانە جاس وسپىرىمدەر اراسىندا وتەدى.

ۇيىمداستىرۋشىلاردىڭ ايتۋىنشا، جارىسقا كاسىبي سپورتشىلارمەن قاتار، قالا تۇرعىندارى مەن قوناقتارى دا ەركىن قاتىسا الادى. قاتىسۋشىلار اسىق اتىپ قانا قويماي، لاڭگى تەۋىپ تە شەبەرلىكتەرىن سىناي الادى.

- بۇل اشىق تۋرنيرگە ەلوردا تۇرعىندارى مەن قوناقتارىن شاقىرامىز. جارىس الاڭىنا كەلىپ، ۇلتتىق ويىننان شىنايى ءلاززات الىڭىزدار. ءىس- شارا ساعات 11:00 دە باستالادى. قالالىق اكىمدىكتىڭ قولداۋىمەن ءوتىپ جاتقان مەرەكەلىك تۋرنير دوستارىڭىزبەن جانە وتباسىڭىزبەن جاقسى كوڭىل كۇي سىيلايتىنىنا سەنىمدىمىز، - دەيدى استانا قالاسىنىڭ اسىق اتۋ بويىنشا اعا جاتتىقتىرۋشىسى ەسكەندىر راحمەتوۆ.

سونىمەن قاتار ءىس-شارا بارىسىندا اسىقتىڭ تۇرلەرى مەن اسىق اتۋ سپورت ءتۇرىنىڭ ەرەكشەلىكتەرى تانىستىرىلىپ، كورەرمەندەرگە قىزىقتى مالىمەتتەر ۇسىنىلادى.

وسىعان دەيىن استانا كۇنى قالاي اتالىپ وتەتىنىن جازعان ەدىك.