ەلوردا حالقىنىڭ سانى 1,5 ميلليوننان استى

استانا. KAZINFORM - ۇلتتىق ستاتيستيكا بيۋروسىنىڭ مالىمەتىنە سايكەس استانا قالاسىنىڭ حالىق سانى 1502102 ادامعا جەتتى.

2024 -جىلعى 1-قازانداعى جاعداي بويىنشا ەلوردادا 1502102 ادام ءومىر ءسۇرىپ جاتىر، ال 1-قىركۇيەكتەگى دەرەكتەرگە سايكەس، ەلوردادا 1490740 ادام بولعان. وسىلايشا، ءبىر ايدا قالا جۇرتى 12 مىڭعا جۋىق ادامعا ارتىپ وتىر. ءوسۋ قارقىنى 5,03 پايىزعا جەتتى.

وتكەن جىلى 1-قازاندا ەلوردادا 1409497 ادام ساناققا الىنعان. ال جىل باسىندا بۇل كورسەتكىش 1430105 ادامعا دەيىن ءوستى.

الماتى قالاسىنا كەلسەك، بيىل 1-قازاندا حالىق سانى 2275541 ادامعا جەتتى. ءبىر جىل بۇرىن بۇل مەگاپوليستە 2211198 ادام ءومىر سۇرگەن.

ۇلتتىق بيۋرونىڭ 1-قازانداعى ستاتيستيكاسى بويىنشا قازاقستان حالقىنىڭ سانى - 20223218 ادام، ءوسۋ قارقىنى 0,95 پايىزعا جەتتى. ونىڭ ىشىندە 12704977 ادام قالادا تۇرادى جانە 7518241 ادام اۋىلدا مەكەندەيدى.

ەسكە سالا كەتسەك، بيىل مامىرداعى ستاتيستيكا بويىنشا قازاقستاندا حالىق سانى 20095963 ادامعا جەتكەن ەدى.