فەستيۆالدىڭ باس پروديۋسەرى ناتاليا ابراشكينانىڭ ايتۋىنشا، Comic Con Astana جىل سايىن اۋقىمىن كەڭەيتىپ كەلەدى.
- جىل سايىن سەرىكتەستەرىمىزدىڭ دە، كەلۋشىلەرىمىزدىڭ دە سانى ارتىپ كەلەدى. فەستيۆال وتەتىن الاڭدار دا كوبەيدى. ءبىزدىڭ باستى ماقساتىمىز - ءار وتباسى وزىنە قىزىقتى دۇنيە تاۋىپ، بۇل ءىس-شاراعا جىل سايىن كەلگىسى كەلەتىندەي اتموسفەرا قالىپتاستىرۋ، - دەدى ول.
بيىل فەستيۆال العاش رەت بىردەن ەكى نىساندا ۇيىمداستىرىلىپ وتىر.
فەستيۆالدەگى باستى ءىس-شارالاردىڭ ءبىرى - حالىقارالىق كوسپلەي بايقاۋى. بيىل ونىڭ جۇلدە قورى 20 ملن تەڭگە.
بايقاۋعا قاتىسۋشىلار تانىمال فيلمدەر، سەريالدار، انيمە، كوميكس جانە كومپيۋتەرلىك ويىن كەيىپكەرلەرىنىڭ بەينەسىن سومدايدى.
- كوسپلەي بايقاۋىنا 20 دان استام ەلدەن ءوتىنىم ءتۇستى. الايدا ولاردىڭ بارلىعى ىرىكتەۋدەن وتە المادى. وتىنىمدەر سانى ءبىز قابىلداي الاتىن قاتىسۋشىلار سانىنان شامامەن سەگىز ەسە كوپ بولدى. سوندىقتان ىرىكتەۋ بىرنەشە كەزەڭ بويىنشا وتە قاتاڭ تۇردە ءوتتى. ناتيجەسىندە 180 قاتىسۋشىنى تاڭدادىق، - دەدى ناتاليا ابراشكينا.
ۇيىمداستىرۋشىلاردىڭ بولجامىنشا، فەستيۆالگە ءتورت كۇن ىشىندە شامامەن 100 مىڭ ادام قاتىسادى دەپ جوسپارلانىپ وتىر.
- قازىر شەتەلدەن كەلەتىن قوناقتاردىڭ ناقتى سانىن ەسەپتەپ جاتىرمىز. ازىرگە بولجام بويىنشا، ءتورت كۇن ىشىندە فەستيۆالگە شامامەن 100 مىڭ ادام كەلەدى. بيلەتتەر ءالى دە ساتىلىپ جاتىر. سوندىقتان ءتورتىنشى كۇننىڭ سوڭىنا قاراي كەلۋشىلەر سانى بۇدان دا كوپ بولۋى مۇمكىن، - دەدى باس پروديۋسەر.
ونىڭ ايتۋىنشا، بيىل فەستيۆال باعدارلاماسى وتباسىلىق دەمالىسقا دا بەيىمدەلگەن.
مۇندا كىشكەنتاي بالالارعا ارنالعان ويىن ايماقتارى، ۇلكەن گەيمينگ الاڭدارى جۇمىس ىستەيدى. سونداي-اق بيىل فەستيۆالگە قاتىساتىن بلوگەرلەر سانى دا ارتقان.
ايتا كەتەيىك، بۇعان دەيىن ەلىمىزدە تامىز ايىندا بەس ءىرى فەستيۆال وتەتىنى حابارلانعان ەدى.
اۆتور
نازەركە سۇيىندىك