سالتاناتتى جيىندا العاش بولىپ ءسوز العان استانا قالاسى نۇرا اۋدانى اكىمىنىڭ ورىنباسارى قۋانىش مولدابەك وتباسى ينستيتۋتىنىڭ ماڭىزى، انانىڭ قوعامداعى ءرولى مەن ۇرپاق تاربيەسىندەگى جاۋاپكەرشىلىگى تۋرالى ايتتى.
- انا دەگەن ءبىر قولىمەن بەسىكتى تەربەتسە، ءبىر قولىمەن الەمدى تەربەتەدى. ء«بىرىنشى بايلىق - دەنساۋلىق، ەكىنشى بايلىق - اق جاۋلىق، ءۇشىنشى بايلىق - ون ساۋلىق» دەپ قازاق ەجەلدەن انالاردىڭ وتباسىنداعى قادىرىن ەرەكشە اتاپ كورسەتكەن. ءار ادامنىڭ بويىنداعى قاسيەتى، تاربيەسى، وتانسۇيگىشتىگى انالارىمىزدىڭ اق سۇتىمەن بەرىلەدى. وتباسىلارىڭىزعا اماندىق، قۇت-بەرەكە تىلەيمىن. ءوسىرىپ- جاتقان ۇل-قىزدارىڭىزدىڭ قىزىعىن كورىڭىزدەر، - دەدى قۋانىش مولدابەك.
سونىمەن قاتار قازاقستان حالقى اسسامبلەياسى انالار كەڭەسى ءتوراعاسىنىڭ ورىنباسارى، جازۋشى كامال الپەيىسوۆا، ق ر پرەزيدەنتى جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيا مۇشەسى سۇڭقار حانگەلدينا، استانا قالاسى اكىمدىگى جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى كوميسسيا ءتوراعاسىنىڭ ورىنباسارى نازگۇل ماقجانوۆا بارشا انالاردى مەرەكەسىمەن قۇتتىقتاپ، ىزگى تىلەكتەرىن ءبىلدىردى.
ءىس-شارا بارىسىندا بالا تاربيەسى مەن قوعامدىق ومىردە بەلسەندىلىگىمەن تانىلعان انالارعا «التىن القا» جانە «كۇمىس القا» تابىس ەتىلدى.
ۇيىمداستىرۋشىلاردىڭ ايتۋىنشا، بۇل باستاما قالانىڭ جاسىل بەلدەۋىن كەڭەيتىپ قانا قويماي، تۇرعىندار اراسىندا تابيعاتقا جاناشىرلىق مادەنيەتىن قالىپتاستىرۋعا باعىتتالعان.
- بۇگىن ەلوردادا وتە ماعىنالى ءىس-شارا ءوتىپ جاتىر. «اناعا تاعزىم» اللەياسىنىڭ اشىلىپ جاتقانىنا قۋانىشتىمىز. «اناعا تاعزىم» دەگەن ءسوزدىڭ ءوزى - ۇلكەن قۇرمەتتىڭ بەلگىسى. بۇل ەلوردامىزعا كورىك بەرەتىن ورىن بولادى دەپ ويلايمىن. قازاق جىلى لەبىزىن بىلدىرگەن كەزدە «جاپىراعىڭ جايىلسىن» دەگەن تىلەك ايتادى عوي. ۇرپاق انا ارقىلى ءوسىپ-ونەدى. انا دەگەن - جايقالعان جاسىل جەلەكپەن بىردەي ۇعىم. سول انالارىمىز سياقتى بۇگىن ەگىلىپ جاتقان ءبىزدىڭ ءار اعاشىمىزدىڭ دا جاپىراعى جايىلىپ، بۇل جەر جانعا سايا كورىكتى ورىننىڭ بىرىنە اينالسىن دەپ تىلەيمىن، - دەدى قر ەڭبەك سىڭىرگەن قايراتكەرى، ءانشى سۆەتلانا ايتبايەۆا.