لوندوندا قازاقشا سويلەۋ كلۋبى اشىلدى
استانا. KAZINFORM - لوندونداعى قازاق ورتالىعى جانە ەرىكتىلەر توبى قازاقشا سويلەۋ كلۋبىن اشتى. ماقساتى ۇلى اباي ءتىلىن مەڭگەرگىسى كەلەتىن شەتەلدىكتەر مەن قانداستارىمىزدىڭ باسىن بىرىكتىرىپ، تىلدىك ورتا قالىپتاستىرۋ.
كلۋبتىڭ تۇساۋكەسەر راسىمىنە Kazinform-نىڭ تۇماندى البيونداعى ءتىلشىمىز عالىمجان قارامان ۇلى قاتىسىپ قايتتى.
ستيۆ سكريۋتين - قارجى سالاسىنىڭ مامانى. اعىلشىن جانە ورىس تىلدەرىندە ەركىن سويلەيدى. ەندى مىنە قازاق ءتىلىن مەڭگەرگىسى بار. شارۋالارىن ىسىرىپ قويىپ، بۇگىن وسىندا كەلدى. سويلەۋ جانە ءتىلدى ءتۇسىنۋ داعدىلارىن جەتىلدىرۋ ءۇشىن كوپ ەڭبەكتەنۋ كەرەكتىگىن ستيۆ مويىندايدى.
«مەن ەندى باستاپ جاتىرمىن. وزىممەن دەڭگەيلەس ءتىل ۇيرەنۋشىلەردى تاپتىم. بۇل ءتىلدى تەز مەڭگەرۋىمە كوپ كومەگىن تيگىزەدى دەپ ويلايمىن. ويتكەنى سوزدىك قورىڭ جانە تىلدىك بازاڭ ولارمەن بىردەي بولادى»، - دەيدى ستيۆ سكريۋتين.
شەتەلدىكتەردىڭ قازاق ءتىلىن ۇيرەنۋدەگى ماقساتى ءار-الۋان. ءبىرى قازاقستانعا تۋريستىك ساپارمەن بارعىسى كەلەدى. ەندى ءبىرىنىڭ جۇبايى قازاق ۇلتىنان. قازاق ءتىلدى ادامعا عاشىق بولىپ قالعاندار دا كەزدەسەدى. تاعى ءبىرىنىڭ قازاق اۆتورلارىنىڭ شىعارمالارىن ءتۇپنۇسقادا وقىپ، تۇسىنگىسى بار.
«اعىلشىن ءتىلىنىڭ مۇعالىمى بولعان سوڭ باسقا تىلدەردى دە مەڭگەرگىم كەلەدى. قازاق ءتىلىنىڭ دىبىستالۋى وتە ۇنايدى. وتكەن جىلى وزدىگىممەن ۇيرەنۋگە تىرىستىم. ءبىراق ولاي قىزىق ەمەس ەكەن. دىبىستالۋىن ەستە ساقتاۋ قيىن جانە ەشكىممەن سويلەسە المايسىڭ»، - دەيدى اعىلشىن ءتىلىنىڭ مۇعالىمى سەباستيان دانن.
قازاقشا سويلەۋ كلۋبىنا تەك شەتەلدىكتەر عانا ەمەس وتانداستارىمىز دا مۇشە. ولار انا ءتىلىن تولىق مەڭگەرمەگەندەرىن ار ساناپ، وسىندا كەلگەن. سونداي-اق باسقا مەملەكەتتە تۋعان قانداستارىمىز دا ءتىل بىلىمدەرىن جەتىلدىرىپ جاتىر.
«قازاقپىن عوي. ۇيدە دە اكە-شەشەم قازاقشا عانا سويلەتكىزەدى. سوندىقتان قازاقشانى ءبىلۋ وتە ماڭىزدى دەپ ويلايمىن. ءوزىم قىتايدان كەلدىم. قىتايدا قىتايشا سويلەيمىن. ءبىراق ۇيدە باسقا ءتىل قولدانبايمىز. انا ءتىلىمدى وتە جاقسى كورەمىن»، - دەيدى ستۋدەنت قىمبات مادەنيەت قىزى.
كلۋب مۇشەلەرى دەڭگەيلەرىنە قاراي شاعىن توپتارعا ءبولىنىپ، بىرنەشە ۇستەل باسىنا وتىردى. ءتۇرلى تاقىرىپتاردا تالقىلاۋلارعا قاتىسىپ، سەنىمدىلىكتەرىن ارتتىردى. شارانىڭ ۇيىمداستىرۋشىلارى ۇلىبريتانياداعى قازاق ورتالىعى جانە ەرىكتىلەر توبى. ولار عيمارات جالداۋ شىعىندارىن، وقۋ- ادىستەمەلىك قۇرالدارىن دايىنداۋ جۇمىستارىن ءوز موينىنا العان.
«مەنىڭ انگليادا تۇرىپ جاتقانىما 24 جىل بولدى. جولداسىم اعىلشىن ۇلتىنان. بالالارىم ەرەسەك، ءوسىپ كەتتى، قازاقشانى دۇرىس بىلمەيدى. جولداسىم ۇيرەنىپ ءجۇر. ەندى ولارعا ۇيرەنەتىن ورتا كەرەك. قازاقستانمەن بايلانىسىمىزدى، مادەنيەتىمىزدى جوعالتپاۋعا، ەلىمىزبەن تىعىز بايلانىستا بولۋ ءۇشىن وسىنداي قادامعا بارىپ وتىرمىز»، - دەيدى قازاقشا سويلەۋ كلۋبىنىڭ ۇيىمداستىرۋشىسى ءاليا قاناتبەك قىزى.
قازاقشا سويلەسۋ كلۋبىنىڭ تۇساۋكەسەر راسىمىندە جاستار مىڭ بۇرالا بي بيلەدى، دومبىرامەن قۇيقىلجىتىپ، كۇي ورىندادى. ۇلى ابايدىڭ ولەڭدەرىن قازاق جانە اعىلشىن تىلدەرىندە وقىدى. كلۋبقا قاتىسۋ تەگىن. باستاپقىدا ايىنا ءبىر رەت باس قوسۋ جوسپارلانىپ وتىر. كوككە شىعىپ، تازا اۋادا ءتىل ۇيرەنۋ دە ويدا بار. سۇرانىس ارتسا، كەزدەسۋلەر جيىرەك وتكىزىلمەك.
اۆتور
عالىمجان قارامان ۇلى