لوندوندا قازاق حالقىنىڭ تىنىس-تىرشىلىگى مەن مادەنيەتىن تانىتاتىن كورمە ءوتىپ جاتىر
لوندوندا قازاقستاندىق سۋرەتشىلەر گۇلنۇر مۇقاجانوۆا مەن ايعانا عاليدىڭ جەكە كورمەسى ءوتىپ جاتىر. ولار ءتول تۋىندىلارى ارقىلى شەتەلدىك كورەرمەنگە ۇلى دالا ەلى مەن كوشپەندىلەردىڭ فيلوسوفياسىن جەتكىزۋدى ماقسات ەتىپ وتىر، دەپ حابارلايدى قازاقپارات ءتىلشىسى.
گۇلنۇر مۇقاجانوۆا ءوز ەڭبەكتەرىندە نەگىزىنەن كيىز جانە ماتا پايدالانادى. «بوساعا» دەپ اتالاتىن دۇنيەسى سول ماتەريالداردان جاسالعان. «بوساعانى اتتاما، بوساعادا تۇرما» دەگەن ۇعىمدار گۇلنۇر ءۇشىن قاسيەتتى. قازاق حالقىمەن عاسىرلار بويى جاساسىپ كەلە جاتقان ىرىم-تىيىمداردى ول وسى كارتيناسى ارقىلى جەتكىزگىسى كەلگەن. تاعى ءبىر تاڭ قالدىرعان تۋىندىسى مالدىڭ تەرىسىنەن جاسالعان ادام دەنەسىنىڭ ءمۇسىنى. جۇرەك تۇسىندا شانشىلىپ تۇرعا ينەلەر مىڭ ءولىپ، مىڭ تىرىلگەن قازاق حالقىنىڭ قايعى-قاسىرەتى دەپ تۇسىندىرەدى ول.
«كوشپەندىلەر ۋاقىتىندا اتا- بابالارىمىز قانشاما قيىندىقتاردان وتكەن وسى كۇنگە دەيىن. بىزگە قالدىرعان سالت- ءداستۇر، ءبىزدىڭ مادەنيەتىمىز بار. مەنىڭ نەگىزگى ماقساتىم قازاقتىڭ ءارۋاقتارىنىڭ رۋحىن كورسەتۋ، ساقتاۋ، الەم حالقىنا جەتكىزۋ، قۇرمەتتەۋ»، دەيدى سۋرەتشى گۇلنۇر مۇقاجانوۆا.
بۇل گۇلنۇردىڭ لوندونداعى ءۇشىنشى كورمەسى. ءوزى بەرليندە تۇرادى. 10 جىلدان استام ۋاقىتتان بەرى ءوز ونەر تۋىندىلارى ارقىلى گەرمانيادا تۋعان جەرىن تانىتىپ ءجۇر. تاعى ءبىر تالانتتى وتانداسىمىز ايعانا ءعاليدىڭ دە ايتارى بار. شەتەلگە ءجيى شىعاتىن سۋرەتشى بۇل جولى «ءتاڭىر» سەرياسىنا كىرەتىن كارتينالارىن اكەلگەن. ءومىردىڭ قالاي باستاۋ الىپ، جالعاساتىنىن جەتكىزۋگە تىرىسقان.
«مەن ءۇشىن مادەنيەتىمىزدى تانىتۋ وتە ماڭىزدى. مەنىڭ ويىمشا، ءبىزدىڭ ەشكىمگە ۇقسامايتىن مەنتاليتەتىمىز بار جانە ونى بارشاعا تۇسىنىكتى تىلمەن، ونەر تىلىمەن جەتكىزۋ قاجەت-اق»، - دەيدى سۋرەتشى ايعانا عالي.
ورتالىق ازيا وكىلدەرىنىڭ ونەر تۋىندىلارىن تاماشالاۋ بريتان جۇرتشىلىعى ءۇشىن ءاردايىم قىزىقتى. ءبىراق قازاقستاندىقتاردىڭ كورمەلەرى لوندوندا ءجيى وتپەيدى. جاھاندانۋ جاعدايىندا ۇلتتىق بىرەگەيلىكتى ساقتاۋعا سەپتىگى تيەتىن شاراعا كەلگەن شەتەلدىك كورەرمەندەر ءبىراز رۋحاني بايىپ قالدىق دەيدى.
«سۋرەتشىلەر وتە تالانتتى جانە ولار حالىقارالىق دەڭگەيدە تانىلۋلارى كەرەك. مەنىڭشە، ەۋروپا حالقى قازاقستاننىڭ زاماناۋي ونەرى تۋرالى ازىرگە بىلە بەرمەيدى. ال مۇنداي گالەرەيالار وتە قاجەت ناسيحات قۇرالى»، دەيدى كورەرمەندەردىڭ ءبىرى الەكسيس دە تيزەنگاۋزەن.
قازاقستاندىق اۆتورلاردىڭ ەڭبەكتەرىمەن تانىس ونەر جاناشىرلارى جەكە توپتامالارىن تولىقتىرۋ ءۇشىن ولاردىڭ كارتينالارى مەن مۇسىندەرىن ءجيى ساتىپ الادى ەكەن.
«ال بۇل ءبىزدى ىنتالاندىرىپ، ءارى قاراي ەڭبەكتەنۋگە شابىت بەرەدى»، دەيدى دارىن يەلەرى. كورمە 15-قازانعا دەيىن جالعاسپاق.