لوندوندا كورولدىك گۆارديا جىلقىسى تۋريستى تىستەپ الدى
لوندوندا ۋايتحولل جانىندا كورولدىك گۆارديانىڭ جىلقىسىمەن فوتوعا تۇسپەكشى بولعان تۋريستى جانۋار تىستەپ الدى، دەپ حابارلايدى Kazinform ءتىلشىسى.
وقيعا ۆيدەوعا كەزدەيسوق ءتۇسىپ قالعان. ات ساياحاتشىنى تارپا باس سالعاندا ايەلدىڭ جان داۋسى شىعىپ، ايقايلاي جونەلگەنىن كورۋگە بولادى. جانىندا تۇرعاندار ونىڭ جاراقاتىن تەكسەرىپ، العاشقى كومەك كورسەتۋگە تىرىسقان.
عيماراتتىڭ قابىرعاسىنداعى: «ابايلاڭىز! جىلقىلار تەۋىپ جىبەرۋى نەمەسە تىستەپ الۋى مۇمكىن» دەگەن جازباعا قاراماستان تۋريستەر جانۋارعا جاقىن تۇرىپ، ەستەلىك فوتوعا تۇسۋگە اۋەس.
«قوعامدىق قاۋىپسىزدىكتى قامتاماسىز ەتۋ ءۇشىن قانشا تىرىسقانىمىزبەن، جىلقىلار تىستەپ نەمەسە تەۋىپ جىبەرۋى مۇمكىن. حالىقتى ەسكەرتۋلەرىمىزگە قۇلاق اسۋعا شاقىرامىز»، - دەپ كورولدىك گۆارديا وكىلدەرى قاۋىپسىزدىك ساقتاۋعا شاقىرىپ، مالىمدەمە جاسادى.
ۋايتحولل - 1530-1689 -جىلدار ارالىعىندا اعىلشىن مونارحتارىنىڭ نەگىزگى رەزيدەنتسياسى بولعان عيمارات. ونىڭ جانىندا جازاتايىم وقيعالار ءجيى بولىپ تۇرادى. TikTok الەۋمەتتىك جەلىسىندە وسىعان ۇقساس بىرنەشە ۆيدەونى كورۋگە بولادى.
«بۇل جىلقىلار - ارنايى دايىندىقتان وتكەن جانۋارلار. ءبىراق ۇزاق ۋاقىت بويى ءبىر جەردە تۇرۋعا ءماجبۇر بولعاندىقتان كۇتپەگەن مىنەز-قۇلىق تانىتۋى مۇمكىن»، - دەپ اتاپ ءوتتى جىلقىلاردىڭ مىنەز-قۇلقىنا ماماندانعان ساراپشى سيۋزاننا رودجەرس.
اۆتور
عالىمجان قارامان ۇلى