ۇلتتىق وليمپيادا كوميتەتى مەن قورعانىس مينيسترلىگى مەموراندۋمعا قول قويدى
استانا. KAZINFORM - ەلوردادا قازاقستان رەسپۋبليكاسىنىڭ قورعانىس مينيسترلىگى مەن ۇلتتىق وليمپيادا كوميتەتى ءوزارا كەلىسىمگە كەلدى. بۇل تۋرالى ۇ و ك حابارلادى.
قورعانىس ءمينيسترى، سپورتتىق جانە جاۋىنگەرلىك سامبودان فەدەراتسيانىڭ پرەزيدەنتى، گەنەرال-پولكوۆنيك رۋسلان جاقسىلىقوۆ جانە ۇ و ك پرەزيدەنتى گەننادي گولوۆكين ءوزارا ىنتىماقتاستىق جونىندەگى قۇجاتقا قول قويدى. تاراپتار اسكەري قىزمەتشىلەر اراسىندا وليمپيادالىق قوزعالىستى قولداۋ، سپورتتىق ينفراقۇرىلىمدى جاقسارتۋ جانە ارميا سپورتشىلارىن دايىنداۋ تيىمدىلىگىن ارتتىرۋ بويىنشا بىرلەسىپ جۇمىس ىستەۋگە ۋاعدالاستى.
قورعانىس ءمينيسترى گەننادي گولوۆكين سىندى تاجىريبەلى، كاسىبي سپورتشىنىڭ ۇ و ك پرەزيدەنتى لاۋازىمىنا تاعايىندالۋى قازاقستاندىق سپورتتىڭ، ونىڭ ىشىندە اسكەري سپورتتىڭ دامۋىنا وڭ اسەرىن تيگىزىپ جاتقانىن اتاپ ءوتتى. سونداي-اق ول قورعانىس مينيسترلىگىنىڭ سپورت كوميتەتى مەن ۇ و ك اراسىنداعى كۇش بىرىكتىرۋ اسكەري سپورتشىلاردىڭ شەبەرلىگىن ارتتىرۋعا ىقپال ەتەتىنىن باسا ايتتى.
- قورعانىس مينيسترلىگىنىڭ ورتالىق سپورت كلۋبى مەن ۇلتتىق وليمپيادالىق كوميتەت اراسىنداعى اسكەري سپورتشىلاردى قولداۋ بويىنشا كۇش بىرىكتىرۋ ولاردىڭ شەبەرلىگىن ارتتىرۋعا سەپ بولادى. سەبەبى ءبىزدىڭ ورتاق ماقساتىمىز - چەمپيون تاربيەلەپ، قازاقستاندى تانىتۋ، - دەدى قورعانىس ءمينيسترى.
گەنەرال-پولكوۆنيك رۋسلان جاقسىلىقوۆ سونداي-اق جاقىن ارادا الماتى قالاسىندا اسكەري-سپورت كوللەدجى اشىلاتىنىن حابارلادى. وندا تاربيەلەنۋشىلەر سپورتتىق، اسكەري جانە تەحنيكالىق ءبىلىم الىپ، اۋىلدىق ءوڭىر جاستارىنا ۇلكەن سپورتتا جوعارى جەتىستىكتەرگە جەتۋگە مۇمكىندىك بەرىلەدى.
قازاقستان ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكين قورعانىس مينيسترلىگىنىڭ وليمپيادا سپورتشىلارىن دايىنداۋعا كورسەتىپ جاتقان قولداۋىن جوعارى باعالايتىنىن جەتكىزدى.
- ءبىزدىڭ ىنتىماقتاستىعىمىز قازاقستاندا سپورتتىڭ ودان ءارى دامۋىنا جانە حالىقارالىق ارەنادا سپورتشىلارىمىزدىڭ بەدەلىن ارتتىرۋعا ىقپال ەتەدى. ماقساتىمىز ورتاق، ال بىرلەسە ارەكەت ەتۋىمىز جەمىستى بولادى دەپ سەنەمىن، - دەدى گەننادي گولوۆكين.
ايتا كەتەيىك، قورعانىس مينيسترلىگىنىڭ سپورت كوميتەتىندە 12 وليمپيادالىق سپورت ءتۇرى دامىتىلىپ جاتىر. ورتالىق سپورت كلۋبىندا 131 سپورتشى جاتتىعادى. وتكەن جىلى اسكەري قىزمەتشىلەر وليمپيادا ويىندارىنا 21 جولداما جەڭىپ الدى. ولاردىڭ تورتەۋى پاريجدەگى وليمپيادادا جۇلدەگەر اتاندى.