ۇلتتىق سۋ رەسۋرستارى اقپاراتتىق جۇيەسى ازىرلەنىپ جاتىر
استانا. KAZINFORM - ۇلتتىق سۋ رەسۋرستارى اقپاراتتىق جۇيەسى سۋ نىساندارى تۋرالى دەرەكتەردى بىرىكتىرەدى. بۇل تۋرالى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ءمالىم ەتتى.
- جىل باسىنان بەرى ءبىزدىڭ مينيسترلىك ەۋرازيا دامۋ بانكىنىڭ تسيفرلىق باستامالار قورىنىڭ گرانتى ەسەبىنەن ۇلتتىق سۋ رەسۋرستارى اقپاراتتىق جۇيەسىن ازىرلەپ جاتىر. اتالعان پلاتفورما ءبىرتۇتاس سيفرلىق ورتا رەتىندە جۇمىس ىستەيدى جانە سۋ نىساندارى تۋرالى دەرەكتەردى بىرىكتىرەدى. ول دەگەنىمىز سپۋتنيكتىك مونيتورينگ، داتچيكتەر مەن ەسەپتەگىش قۇرالدار، گيدروپوستتار، جەدەل ەسەپتىلىك جانە سالالىق ستاتيستيكا. سونىمەن قاتار سۋارمالى جەلىلەر مەن سۋ رەسۋرستارىن ەسەپكە الۋدى اۆتوماتتاندىرۋ باعىتىندا جۇمىس جۇرگىزىلىپ جاتىر، - دەدى نۇرجان نۇرجىگىتوۆ ۇكىمەت وتىرىسىندا.
مينيستر كەلتىرگەن مالىمەتكە سۇيەنسەك، بۇگىندە 3,5 مىڭ شاقىرىمنان استام سۋارۋ ينفراقۇرىلىمىن جاڭعىرتۋ جانە تسيفرلاندىرۋ ماقساتىندا كانالدار كەزەڭ-كەزەڭىمەن اۆتوماتتاندىرىلىپ جاتىر.
- اتاپ ايتقاندا، بيىل قىزىلوردا وبلىسىندا 58 گيدروبەكەتتى اۆتوماتتى سۋ ەسەپتەۋ قۇرالدارىمەن جابدىقتالىپ جاتىر. سونىمەن قاتار تۇركىستان، جامبىل، قىزىلوردا، الماتى جانە جەتىسۋ وبلىسىندا جالپى ۇزىندىعى 5 مىڭ شاقىرىمنان استام سۋارۋ جەلىلەرىن تسيفرلاندىرۋعا ارنالعان جوبالىق- سمەتالىق قۇجاتتاما ازىرلەنىپ جاتىر، - دەيدى ول.
بۇگىن ۇكىمەت وتىرىسىندا سۋ شارۋاشىلىعىنا قاتىستى ماسەلەلەر تالقىلانىپ جاتىر.