ۇلتتىق قوردان بالالارعا تولەنەتىن سوما قالاي قالىپتاسادى

 استانا. KAZINFORM - ۇلتتىق بانك ءتوراعاسى تيمۋر سۇلەيمەنوۆ «ۇلتتىق قور - بالالارعا» باعدارلاماسى بويىنشا تولەم سوماسىنىڭ نەگە بايلانىستى بولاتىندىعىنا قاتىستى ساۋالعا جاۋاپ بەردى.

ونىڭ ايتۋىنشا، بالالارعا بەرىلەتىن سوما ۇلتتىق بانكتىڭ قانشالىقتى تولىقتىرىلاتىندىعىنا، ودان قانشا قاراجات الىناتىندىعىنا جانە قور اكتيۆتەرىنىڭ قانشالىقتى ءتيىمدى باسقارىلاتىندىعىنا بايلانىستى بولماق.

«ەگەر سوڭعى، ۇلتتىق قوردىڭ باسقارىلۋىنا قاتىستى ەلەمەنتتى الار بولساق، وندا وتكەن جىلدىڭ قورىتىندىسىندا ۇلتتىق بانك رەكوردتىق - 6 ميلليارد دوللاردان استام كىرىس الدى. بۇل جىلدىق ماندە - 11 پايىز. ۇلتتىق قور قۇرىلعان ساتتەن بەرگى رەكوردتىق سيفر سانالادى. ەگەر ۇلتتىق بانك وسىلاي جۇمىس ىستەسە، ەگەر ۇكىمەت ۇلتتىق قورعا ۇنەمى تۇسەتىن سالىقتاردى جيناۋ تۇرعىسىنان جۇمىس ىستەسە، ەگەر مينيسترلىكتەردىڭ، مەملەكەتتىك حولدينگتەردىڭ تاراپىنان ۇلتتىق قوردان اقشا الۋعا قاتىستى كوپ ۇسىنىس بولماسا، وندا، ارينە، بولىنۋگە ءتيىس سوما دا جوعارى بولماق»، - دەدى ول ەلوردادا وتكەن بريفينگتە ب ا ق وكىلدەرىنىڭ ساۋالىنا وراي.

ۇلتتىق بانك ءتوراعاسىنىڭ ايتۋىنشا، «ۇلتتىق قور - بالالارعا» باعدارلاماسى ەلدىڭ 5 جىلعا ارنالعان الەۋمەتتىك- ەكونوميكالىق دامۋ بولجامىنا نەگىزدەلەدى. ول بيۋدجەتپەن بىرگە بەكىتىلەدى.

«ول وتكەن جىلدىڭ كۇزىندە بەكىتىلدى. ۇكىمەتپەن مۇنايعا قاتىستى بولجامدى تالقىلاعان كەزدە تاياۋ ەكى جىلدا 80 دوللار شاماسىندا بولادى دەگەن ورتاق سيفرعا ۇيىستىق. ودان كەيىن، ەگەر سىرتقى اسەرلەر بولماسا باعا بىرتىندەپ تومەندەي باستايدى. سوندىقتان ۇلتتىق قور بويىنشا جانە «ۇلتتىق قور-بالالارعا» باعدارلاماسى بويىنشا پارامەترلەر وزگەرمەيدى. سول سەبەپتى سىرتقى ورتا وزگەرمەيدى جانە جوسپارلاعان قاراجات سول دەڭگەيدە ساقتالادى دەپ ۇمىتتەنەمىز»، - دەدى تيمۋر سۇلەيمەنوۆ.