ۇلتتىق قوردان بالالارعا اۋدارىلاتىن قاراجاتتى ەم-دومعا جۇمساۋعا بولا ما

ۇلتتىق قوردان بالالاردىڭ شوتىنا اۋدارىلاتىن تولەمدى ەم-دومعا جۇمساۋعا بولمايدى. بۇل تۋرالى ءماجىلىس دەپۋتاتى بەرىك بەيسەنعاليەۆ ايتتى، دەپ حابارلايدى قازاقپارات ءتىلشىسى.

«ءبىز بۇل قاراجاتتى ەمدەلۋگە جۇمساۋ ماسەلەسىن ۇزاق تالقىلادىق. دەنساۋلىق ساقتاۋ مينيسترلىگىمەن، ۇلتتىق ەكونوميكا، قارجى مينيسترلىگىمەن، جۇرتشىلىقپەن، جۇمىس توبى مۇشەلەرىمەن بىرلەسە قاراستىردىق. بۇل اقشانى 1 جانە 2- توپتاعى مۇگەدەكتەر وزدەرىنىڭ ەم-دومىنا الۋ مۇمكىندىگىن دە پىسىقتادى. دەگەنمەن، بۇل ساناتتاعى ازاماتتارعا ارنالعان جەكە باعدارلاما بار، ياعني ءتيىستى جاردەماقى اۋدارىلىپ جاتىر. جالپى، اتالعان زاڭ جوباسى اياسىندا ەم-دومعا قاراجات اۋدارۋ قاراستىرىلماعان»، - دەدى ب. بەيسەنعاليەۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

بۇدان بۇرىن حابارلانعانداي، بۇگىن ءماجىلىستىڭ جالپى وتىرىسىندا «كەيبىر زاڭنامالىق اكتىلەرگە قازاقستان رەسپۋبليكاسىنىڭ ۇلتتىق قورىنان بالالارعا تولەم جاساۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكىنشى وقىلىمدا قارالىپ، قابىلداندى.

قۇجاتتا ۇلتتىق قوردىڭ جىل سايىنعى ينۆەستيتسيالىق كىرىسىنىڭ 50 پايىزىن بالالارعا 18 جاسقا تولعانعا دەيىن ولاردىڭ ارنايى جيناقتاۋ شوتتارىنا اۋدارۋ ەسكەرىلگەن. شوتتا جيناقتالعان قاراجاتتى 18 جاسقا تولعاننان كەيىن عانا پايدالانۋ مۇمكىندىگى بەرىلەدى.

كامەلەتكە تولعان كەزدە جينالعان قاراجاتتى تۇرعىن ءۇي جاعدايلارىن جاقسارتۋعا نەمەسە ءبىلىم الۋعا جۇمساي الادى.