ۇلتتىق قورعا تىكەلەي سالىق اۋداراتىن مۇناي ۇيىمدارىنىڭ سانى 8,5 ەسە قىسقارىپ كەتكەن

استانا. KAZINFORM - جوعارى اۋديتورلىق پالاتا جۇرگىزگەن اۋديت 2024-جىلى ۇلتتىق قورعا تىكەلەي سالىق اۋداراتىن مۇناي ۇيىمدارىنىڭ سانى 8,5 ەسە قىسقارىپ كەتكەنىن انىقتاعان. پالاتا مۇشەسى نۇرلان نۇرجانوۆ ماجىلىستەگى وتىرىستا وسىنداي دەرەك كەلتىردى.

- ۇلتتىق قوردىڭ اكتيۆتەرى 2024-جىلدىڭ قورىتىندىسى بويىنشا ج ءى ءو- ءنىڭ 20 پايىزىن عانا قۇرادى. بۇل - سوڭعى 15 جىلداعى ەڭ تومەنگى كورسەتكىش. جالپى ۇلتتىق قوردىڭ قاراجاتى سوڭعى 10 جىلدا رەسپۋبليكالىق بيۋجەتتىڭ ورتا ەسەپپەن 30 پايىزىن، ونىڭ ىشىندە 2024-جىلى 23 پايىزىن قامتاماسىز ەتتى. ۇلتتىق قورعا 2024-جىلى تۇسكەن سالىق 3,8 تريلليون تەڭگە بولسا، رەسپۋبليكالىق بيۋجەتكە الىنعان ترانسفەرتتەر كولەمى 5,6 تريلليون تەڭگە بولدى. 40 پايىز وسكەن، - دەدى ول.

الايدا، قور اكتيۆتەرىن باسقارۋدان تۇسكەن كىرىس 5 تريلليون تەڭگە بولىپ، جالپى وڭ بالانسقا اسەر ەتكەن.

- ۇلتتىق قورعا 2024-جىلى تۇسكەن تىكەلەي سالىق 2023-جىلمەن سالىستىرعاندا 16 پايىز تومەندەگەن. ۇلتتىق قورعا تىكەلەي سالىق تولەيتىن مۇناي ۇيىمدارىنىڭ 2024-جىلعا ارنالعان تىزبەسى 8,5 ەسە قىسقارىپ، 166 ميلليارد تەڭگە تۇسپەي قالعان. وسىنىڭ سالدارىنان ۇلتتىق قوردىڭ اكتيۆتەرىن 2030-جىلعا دەيىن 100 ميلليارد دوللارعا جەتكىزۋ تۋرالى ماقساتتىڭ ورىندالماۋىنا ەلەۋلى تاۋەكەلدەر تۋىنداپ وتىر، - دەدى پالاتا مۇشەسى.

سونداي-اق، ول ۇكىمەت بىلتىر بيۋجەتتىڭ شىعىس بولىگىن 13 رەت وزگەرتكەنىن اتاپ ءوتتى.