ۇلتتىق قۇراما ويىنشىسى ءبىرىنشى ليگاداعى «ەرتىس» ساپىنا اۋىستى

استانا. KAZINFORM - قازاقستاندىق جارتىلاي قورعاۋشى ارمان كەڭەسوۆ «ەرتىس» فۋتبول كومانداسىنىڭ قاتارىنا قوسىلدى. بۇل جونىندە كوماندانىڭ باسپا ءسوز قىزمەتى ءمالىم ەتتى.

- ارمان كەڭەسوۆتىڭ قاتارىمىزعا قوسىلعانى جايلى رەسمي تۇردە حابارلايمىز. 24 جاستاعى جارتىلاي قورعاۋشى وسكەن ولكەسىنىڭ كلۋبىندا ماۋسىمنىڭ سوڭىنا دەيىن ونەر كورسەتەدى، - دەلىنگەن حابارلامادا.

«ەرتىس» فۋتبول ورتالىعىنىڭ تۇلەگى نەگىزگى كوماندا ساپىندا 2018-جىلى تۇساۋكەسەر ويىنىن وتكىزگەن ەدى. ول «ەرتىس» جاستار قۇراماسىندا 58، نەگىزگى كوماندادا 14 ماتچقا قاتىسقان.

سونداي-اق ارمان «اقتوبە» كومانداسىنىڭ جەيدەسىندە ءۇش ماۋسىم الاڭعا شىعىپ، 81 كەزدەسۋگە قاتىستى. ناتيجەسىندە 11 گول سوعىپ، 6 ناتيجەلى پاسىمەن كوزگە ءتۇستى. «اقتوبەمەن» بىرگە قازاقستاننىڭ ۆيتسە-چەمپيونى اتانىپ، ەكى مارتە قولا جۇلدەگەر بولعان. سونىمەن قاتار رەسەيلىك «سكا-حاباروۆسك» جانە قىزىلوردالىق «قايسار» كلۋبتارىندا دوپ تەپتى. بيىلعى ماۋسىمدا ەلىمىزدىڭ جوعارى بىرىنشىلىگىندە «استانا» كلۋبىنىڭ نامىسىن قورعاعان. جالپى قازاقستان پرەمەر-ليگاسىندا 106 ماتچ وتكىزىپ، 14 گولدى ءوز اتىنا جازدى.

ارمان كەنەسوۆ قازاقستان ۇلتتىق قۇراماسى ساپىندا 4 ويىن وتكىزگەن.

ەسكە سالساق، بۇدان بۇرىن «تۇران» كومانداسىنا جاڭا باپكەر تاعايىندالعانىن حابارلاعان ەدىك.