ۇلتتىق قۇراما بەدەلدى باسەكەگە جاقىنداي ءتۇستى
فۋتبولدان قازاقستان قۇراماسى 2024 -جىلعى ەۋروپا چەمپيوناتى ىرىكتەۋ ساتىسىندا جوعارى دەڭگەيدە ويىن كورسەتتى. سوڭعى تۋرعا دەيىن قۇرلىقتىق دودانىڭ فينالدىق ساتىسىنا تىكەلەي جولداما الۋعا ۇمىتكەر بولدى.
ەندى قازاقستاندىق فۋتبولشىلار ۇلتتار ليگاسى پلەي- وفف ساتىسىندا تاعى ءبىر جولدامانى ساراپقا سالۋعا مۇمكىندىك الىپ وتىر. Kazinform ۇلتتىق قۇرامانىڭ قۇرلىقتىق دودانىڭ ىرىكتەۋ ساتىسىنداعى ويىندارى مەن ۇلتتار ليگاسى پلەي- وفف ساتىسىنداعى مۇمكىندىگىن تارازىلاپ كورگەن ەدى.
كەيىنگى ەكى جىلدا ۇلتتىق قۇرامامىز ەۋروپا قۇرلىعىندا بىلىكتى مامانداردىڭ جوعارى باعاسىن الدى. 2022 -جىلى ۇلتتار ليگاسىنىڭ C ديۆيزيوندا سلوۆاكيا، بەلارۋس جانە ازەربايجان قۇرامالارىن ارتقا قالدىرىپ، الداعى ۋاقىتتا B ليگاسىندا وينايدى. سول ساتتىلىك ەۋروپا چەمپيوناتى ىرىكتەۋ ساتىسىندا دا جالعاستى. ءوز توبىندا دانيا، سلوۆەنيا، فينليانديا. سولتۇستىك يرلانديا، سان- مارينومەن جولىققان ەل قۇراماسى قاي- قايسىسىمەن دە تەرەزەسى تەڭ دەڭگەيدە ويىن كورسەتۋگە بولاتىنىن دالەلدەدى. ازۋلى دەگەن دانيانىڭ ءوزىن ءوز الاڭىندا جەڭىپ، فينليانديا مەن سولتۇستىك يرلانديانى تىزە بۇكتىردى. ەكى كەزدەسۋدە دە سلوۆەنيامەن بىردەي دەڭگەيدە ويناعانىمەن ساتتىلىك قارسىلاس قۇراما جاعىنا بۇرىلدى.
«العاشقى كەزدەسۋىندە سلوۆەنيامەن ويناۋ ءبىزدىڭ قۇراماعا وڭايعا سوققان جوق. وتكەن ۇلتتار ليگاسىنداعى جەتىستىگىنەن كەيىن قازاقستان قۇراماسىمەن كوپ قارسىلاسى ساقتىقپەن وينايتىن بولدى. وعان قوسا، جانكۇيەرلەر تالابى دا كۇشەيدى. راس، اتالعان كەزدەسۋدە قازاقستاندىق فۋتبولشىلار العاشقى بولىپ گول سوقتى. سوڭعى جاعىندا بوساڭسىپ قالعانداي سەزىلدى. قازىر ۇلتتىق قۇرامادا ءوز ورنىن ەنشىلەپ ۇلگەرگەن رامازان ورازوۆ، باحتيەر زاينۋتدينوۆ سەكىلدى جاستار كەلەشەكتە جانكۇيەر كوڭىلىنەن شىعاتىن شەبەرلىگىن تانىتا بىلەدى. ولارعا قوسا ماكسيم سامورودوۆ، رۋسلان ۆاليۋللين جاستىق پەن تاجىريبەنىڭ تولىسقان شاعىندا جاسىل الاڭدا جارقىلداپ كوزگە ءتۇسىپ كەلەدى»، - دەيدى سپورت كوممەنتاتورى ازيز ورازبايەۆ.
شىنىندا، بۇرىنعى جىلداردا ۇلتتىق قۇرامانىڭ سۇرەڭسىز ويىنى جانكۇيەردى مەزى ەتىپ جىبەرەتىن. الەم جانە ەۋروپا چەمپيوناتى ىرىكتەۋ ساتىلارىندا ءوز توبىندا كوشتىڭ سوڭىندا جۇرۋىنە كوز ۇيرەنگەن بولاتىن. كەيىنگى جىلدارداعى سەنىمدى كورسەتكىشى جانكۇيەرلەردىڭ قازاقستاندىق فۋتبولشىلارعا دەگەن تالابىن كۇشەيتە ءتۇستى.
2022 -جىلدىڭ 27-ساۋىرىندە ۇلتتىق قۇراما تىزگىنىن ۇستاعان ماگومەد اديەۆ سودان بەرى 18 ويىنعا باسشىلىق جاسادى. ونىڭ ىشىندە ون كەزدەسۋدە فۋتبولشىلاردى جەڭىسكە جەتەلەپ، بىرەۋىندە تەڭ تۇسسە، جەتەۋىندە قارسىلاسىنا ەسە جىبەرىپ قويدى. دەگەنمەن، بۇل - جاقسى كورسەتكىش.
ايتا كەتسەك، ۇلتتىق قۇراما قۇرلىقتىق دودادا التى مارتە جەڭىسكە جەتىپ، تورتەۋىندە جەڭىلدى. وسىلايشا ءوز تاريحىندا تۇڭعىش رەت ىرىكتەۋ ساتىسىندا ەڭ كوپ جەڭىسكە جەتتى. سونداي-اق، العاش رەت كوپ گول سوعۋىمەن ەرەكشەلەندى. قازاقستاندىق فۋتبولشىلار ىرىكتەۋ ساتىسىندا قارسىلاستار قاقپاشىسىن 16 مارتە قاپى قالدىرسا، ءوز قاقپاسىنا 12 مارتە گول جىبەرىپ الدى.
ناۋرىزدا جولداما بۇيىرا ما؟
ەل قۇراماسىنىڭ 2024 -جىلى گەرمانيا جەرىندە وتەتىن قۇرلىقتىق دودا فينالدىق ساتىسىنا شىعۋىنا ءالى دە مۇمكىندىگى بار. ول ءۇشىن ۇلتتار ليگاسى پلەي-وفف ساتىسىنىڭ جارتىلاي فينالىندا گرەكيامەن شەبەرلىك بايقاسادى. بۇل قارسىلاسىن جەڭگەن جاعدايدا گرۋزيا جانە ليۋكسەمبۋرگ جۇبىنىڭ جەڭىمپازىمەن فينالدا وينايدى. ارينە، ولاردىڭ ءاربىرى قۇرلىقتىق دودادا ۇزدىك 24 قۇراما قاتارىندا باق سىناۋعا بار كۇشىن سالاتىنى انىق. دەسە دە، قازاقستاندىق فۋتبولشىلار دا جەڭىستى وڭايلىقپەن بەرە قويمايدى دەگەن ويدامىز.
جالپى، بۇدان بۇرىنعى جىلداردا ساتسىزدىكتەن كوش اشپاي كەلگەن ۇلتتىق قۇرامانىڭ كەيىنگى ەكى جىلدا تۇرلەنىپ شىعا كەلگەنىنىڭ سەبەبى نەدە؟ بۇل ورايدا، قىزىلوردالىق «قايساردا» ويناعان بۇرىنعى فۋتبولشى الدان بالتايەۆ ءوز ويىن بىلايشا جەتكىزدى.
«قازاقستان فۋتبول فەدەراتسياسىنىڭ ۋ ە ف ا قۇرامىنا ەنگەنىنە جيىرما جىلدان استام ۋاقىت ءوتتى. سودان بەرگى ۋاقىتتا ۇلتتىق قۇراما مول تاجىريبە جيناقتادى. قارسىلاستاردىڭ ىعىنا جىعىلا بەرۋدىڭ رەتى جوق ەكەنىن ۇعىندى. بۇل سەنىمدىلىكتى كۇشەيتتى. جالپى، ءاربىر قۇرامانىڭ وسىنداي ورلەيتىن كەزەڭى بولادى. قازىر ەۋروپا چەمپيوناتى فينالدىق ساتىسىنا شىعۋعا ۇمىتكەر قۇرامانىڭ ءبىرى ليۋكسەمبۋرگ كەزىندە كوشتىڭ سوڭىندا جۇرەتىن. سونداي- اق، ورتانقول سانالاتىن لاتۆيانىڭ ءوزى 2004 -جىلى قۇرلىقتىق دودادا باق سىناپ قايتتى. سوندىقتان قازاقستان قۇراماسىنىڭ مۇنداي جوعارى دەڭگەيدەگى تۋرنيرگە قاتىسۋىنا زور مۇمكىندىگى بار دەپ سانايمىن»، - دەدى ول.
راسىندا، ءبىزدىڭ قۇراما ءۇشىن الداعى ناۋرىز ايىندا ۇلكەن سىناق تۇر. پلەي-وفف ساتىسىنداعى ەكى ويىننان كەيىن فۋتبولشىلار قۇرلىقتىق دودانىڭ جولداماسىنا قول جەتكىزە الا ما؟ ونى ۋاقىتىندا كورەمىز.
تالانتتى جاستار ءوسىپ كەلەدى
قازىر ۇلتتىق قۇراما ساپىنداعى ءبىرقاتار ويىنشى ەۋروپانىڭ بەلدى كلۋبتارىندا ويناۋعا مۇمكىندىك الدى. اتاپ ايتقاندا، جارتىلاي قورعاۋشى باحتيەر زاينۋتدينوۆ تۇركيانىڭ «بەشيكتاش» كلۋبىندا دوپ تەپسە، قورعاۋشى نۇرالى ءالىپ رەسەيدىڭ «زەنيت»، مارات بىستروۆ «احمات» كوماندالارىندا تۇراقتى تۇردە جاسىل الاڭعا شىعىپ ءجۇر. ال تاعى ءبىر جاس جۇلدىز رامازان ورازوۆ سلوۆەنيانىڭ «كوپەر» كلۋبىنىڭ نامىسىن قورعايدى. قاي-قايسىسى دا شەبەرلىگى شىڭدالعان تاجىريبەلى فۋتبولشىلار. قۋانتاتىنى، ولاردىڭ بارلىعى 23-25 جاستاعى جاستار بولىپ وتىر. ەندەشە، قازاقستاندىق قۇراما الداعى ۋاقىتتا دا ەۋروپا تورىندە تالايدى تاڭعالدىراتىن ويىندار وتكىزەتىنىنە سەنىم ارتامىز.
«سوڭعى ۋاقىتتا ولاردىڭ قاتارى تاعى دا تولىعا باستادى. قوستانايدىڭ «توبىلىندا» ويناپ جۇرگەن يسلام چەسنوكوۆ، رومان اسرانكۋلوۆ، قاراعاندىنىڭ «شاحتەرىنەن» يۆان سۆيريدوۆ، «اقتوبە» ساپىنان ماكسيم سامورودوۆ، ارمان كەڭەسوۆ شەبەرلىگىمەن كوزگە ءتۇستى. الداعى ۋاقىتتا مىقتىلار سانى كوبەيە تۇسەتىنىنە سەنىم كامىل. نەگىزىندە فۋتبولدى دامىتۋدا بالالار سپورتىن دامىتۋدىڭ ماڭىزى زور. بۇل جايىندا ماسەلە ءجيى قوزعالىپ كەلەدى. ول ۇنەمى ەلدىڭ نازارىندا بولاتىن تاقىرىپ ەمەس پە؟ ەلىمىزدە بۇعان بايلانىستى ءسال دە بولسا قوزعالىس بار. ەندىگى كەزەكتە ول ءوز دەڭگەيىندە شەشىلەدى دەگەن ويدامىن»، - دەيدى ۇلتتىق قۇرامانىڭ جانكۇيەرى ەسەنجول نازاروۆ.
جانكۇيەر كوز تىككەن ءىرى تۋرنيرلەر ءاربىر ەلدەگى فۋتبولدىڭ دامۋ دەڭگەيىن تارازىلايدى. راس، كەيىنگى جىلداردا ەلىمىزدە بۇل باعىتتا وڭ سەرپىن بار. دەسە دە، ءالى قولعا الاتىن جۇمىستار بارشىلىق. باستىسى، بالالار فۋتبولىن دامىتۋدىڭ ماڭىزى زور. بۇل باعىتتا ينفراقۇرىلىمدى دامىتىپ، جاڭادان ستاديوندار سالۋعا نازار اۋدارعان ارتىق ەمەس. ول ءوز جەمىسىن بەرەتىن بولادى.
اۆتور
ءادىلجان ۇمبەت