ۇلتتىق قاۋىپسىزدىك كوميتەتى جالعان اقپارات تۋرالى ەسكەرتتى

استانا. KAZINFORM - ق ر ۇلتتىق قاۋىپسىزدىك كوميتەتى جالعان اقپارات تاراعانىن حابارلادى.

- الەۋمەتتىك جەلىلەردە پاتريوتتىققا قارسى ريتوريكانى تاراتاتىن، «بەسسمەرتنىي پولك» اكسياسىنا بويكوت جاريالاۋعا شاقىراتىن نەمەسە قوعامدى جىككە بولۋگە باعىتتالعان وزگە دە ارەكەتتەردى جاسايتىن تۇلعالار تۋرالى اقپارات جيناۋ ءۇشىن Telegram بوتى قۇرىلعانى تۋرالى «قازاقستان رەسپۋبليكاسى ۇلتتىق قاۋىپسىزدىك كوميتەتى باسپا ءسوز قىزمەتىنىڭ رەسمي مالىمدەمەسى» دەگەن اقپارات تاراپ جاتىر، - دەلىنگەن حابارلامادا.

ۇ ق ك اتالعان «مالىمدەمە» - جالعان، ونداعى مالىمەتتەر شىندىققا جاناسپايتىنىن ەسكەرتتى.

ۇ ق ك-نىڭ رەسمي اقپاراتتارى تەك «knb.gov.kz» سايتى، «knbgov_kz» تەلەگرام-ارناسى جانە «knbgovkz» دەپ اتالاتىن Instagram پاراقشاسى ارقىلى جاريالانادى.

- تەك رەسمي دەرەككوزدەرگە سەنىپ، جالعان اقپارات تاراتپاۋعا شاقىرامىز، - دەپ حابارلادى قۇزىرلى ورگاننىڭ باسپا ءسوز قىزمەتى.

ەسكە سالا كەتەيىك، بۇعان دەيىن ۇ ق ك استانا جانە 3 وبلىستا تەرروريزمدى ناسيحاتتاعان 4 ازامات ۇستادى.