ۇلتتىق ۋنيۆەرسيتەتتەردە قىتاي ءتىلىن وقىتاتىن كافەدرالار قۇرىلادى - ساياسات نۇربەك

استانا. KAZINFORM - قازاقستان مەن قىتاي عىلىم جانە ءبىلىم سالاسىندا ءبىرقاتار كەلىسىمگە كەلدى. تولىعىراق عىلىم جانە جوعارى ءبىلىم ءمينيسترى ساياسات نۇربەك ايتىپ بەردى.

«بۇگىن الەمنىڭ نازارى استانادا دەپ ايتۋعا بولادى. ش ى ۇ-عا مۇشە ەلدەردىڭ باسشىلارى ەلوردادا جينالىپ وتىر، قۇرمەتتى قوناقتاردىڭ قاتارىندا ب ۇ ۇ-نىڭ باس حاتشىسى انتونيۋ گۋتەرريش مىرزا دا بار. كەشە قىتاي حالىق رەسپۋبليكاسىنىڭ ءتوراعاسى شي جينپيڭنىڭ ەلىمىزگە رەسمي ساپارى اياسىندا كوپتەگەن كەلىسىمشارتقا قول قويىلدى. ونىڭ ىشىندە ەكى ەلدىڭ مينيسترلىگى ءبىلىم جانە عىلىم سالاسى بويىنشا دا كەلىسىمگە كەلدى. وعان سايكەس ءبىزدىڭ جەتەكشى، ۇلتتىق جانە مەملەكەتتىك ۋنيۆەرسيتەتتەردە قىتاي ءتىلىن وقىتۋ ءۇشىن ارنايى كافەدرالار قۇرىلادى. باكالاۆر، ماگيستراتۋرا مەن دوكتورانتۋرادا وقىپ جاتقاندارعا قىتاي ءتىلىن ەكىنشى ءتىل رەتىندە ۇسىناتىن بولامىز»، - دەدى ساياسات نۇربەك ەلوردادا ءوتىپ جاتقان «جوعارى ءبىلىم بەرۋ جانە ءوندىرىستى ينتەگراتسيالاۋ سالاسىنداعى ىنتىماقتاستىق» اتتى حالىقارالىق سيمپوزيۋمدا.

سونداي-اق، مينيستر قىتاي - قازاقستاننىڭ ەڭ ۇلكەن ستراتەگيالىق كورشى ەلى ەكەنىن تىلگە تيەك ەتتى.

«قىتاي- ەكونوميكا، ساۋدا جاعىنان دا سەرىكتەس ەل، سوندىقتان قىتايدىڭ تاريحىن، ءتىلىن، مادەنيەتىن ءبىز تەرەڭىنەن ءتۇسىنۋىمىز كەرەك. تاعى ءبىر كەلىسىم، ساتپايەۆ ۋنيۆەرسيتەتىنىڭ نەگىزىندە گونكونگ ۋنيۆەرسيتەتىنىڭ فيليالى اشىلادى. وندا جاساندى ينتەللەكت، ارحيتەكتۋرا، اقىلدى كولىك تاعى سول سياقتى سالالار بويىنشا ءبىلىم بەرىلەدى. اتالعان گونكونگ قالالىق ۋنيۆەرسيتەتى وتە تەز دامىپ كەلە جاتقان جوعارى وقۋ ورنى، الەمدەگى ۇزدىك 100 ۋنيۆەرسيتەتتىڭ قاتارىنا كىرەدى. بيىل قىركۇيەكتە ۋنيۆەرسيتەت فيليالى ەسىگىن اشادى»، - دەيدى ول.

بۇعان دەيىن ق ر پرەزيدەنتىنىڭ كەڭەسشىسى بولات اقشولاقوۆ ش ى ۇ سامميتى جانە ۇيىمعا مۇشە ەلدەر اراسىندا عىلىم مەن جوعارى ءبىلىمدى دامىتۋعا قاتىستى پىكىر بىلدىرگەن ەدى.

بۇگىن ەلورداداعى Astana IT ۋنيۆەرسيتەتىندە «جوعارى ءبىلىم بەرۋ جانە ءوندىرىستى ينتەگراتسيالاۋ سالاسىنداعى ىنتىماقتاستىق» دەگەن اتاۋمەن حالىقارالىق سيمپوزيۋم ءوتىپ جاتىر.

جيىن بارىسىندا «ش ى ۇ-عا قاتىسۋشى ەلدەردىڭ جوعارى ءبىلىم بەرۋ سالاسىنداعى حالىقارالىق ىنتىماقتاستىعى» كىتابىنىڭ تۇساۋى كەسەر ءراسىمى جوسپارلانىپ وتىر.

ايتا كەتەيىك، قازىر ەلورداداعى تاۋەلسىزدىك سارايىندا قازاقستان توراعالىعىمەن شاڭحاي ىنتىماقتاستىق ۇيىمىنىڭ سامميتى باستالدى.

قازاقستان پرەزيدەنتى قاسىم-جومارت توقايەۆ ش ى ۇ سامميتىنە كەلگەن مارتەبەلى مەيمانداردى قارسى الىپ، قول الىستى.

اۆتور

داۋلەت ىزتىلەۋ