ۇلتتىق مۋزەيدە «دۇنيە ديدارىنداعى ديماش» كورمەسى اشىلدى
استانا. KAZINFORM - بۇگىن استاناداعى قازاقستان رەسپۋبليكاسىنىڭ ۇلتتىق مۋزەيىندە قازاقستاننىڭ حالىق ءارتىسى، كومپوزيتور جانە مۋلتي اسپاپشى ديماش قۇدايبەرگەننىڭ شىعارماشىلىعىنا ارنالعان «دۇنيە ديدارىنداعى ديماش» اتتى كورمەنىڭ اشىلۋ سالتاناتى ءوتتى.
كورمە، ديماشتىڭ استاناداعى اۋقىمدى كونسەرتىنە ورايلاستىرىلىپ، ونىڭ ونەردەگى جەتىستىكتەرى مەن شىعارماشىلىق جولىنا ارنالعان ماڭىزدى مادەني كەڭىستىك رەتىندە ۇيىمداستىرىلدى.
بۇل كورمەنىڭ ماقساتى - كورەرمەندەرگە ديماش قۇدايبەرگەننىڭ ءومىرى مەن شىعارماشىلىعىنداعى ماڭىزدى ساتتەردى كورسەتۋ، ونىڭ ۇلتتىق جانە حالىقارالىق دەڭگەيدە قول جەتكىزگەن جەتىستىكتەرىن ايقىنداۋ. ەكسپوزيتسيانىڭ نەگىزگى ءبولىمى ءارتىستىڭ جەكە زاتتارى، ساحنالىق ومىرىنە قاتىستى قۇندى جادىگەرلەر مەن الەمدىك مادەنيەتكە قوسقان ۇلەسىن ايقىندايتىن ەكسپوناتتاردان تۇرادى.
كورمەنىڭ اشىلۋ سالتاناتىنا الەمنىڭ 50-دەن اسا ەلىنەن كەلگەن كورەرمەندەر قاتىستى، ولاردىڭ قاتارىندا قىتاي، ا ق ش، كانادا، رەسەي جانە باسقا ەلدەردىڭ وكىلدەرى بولدى.
قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا اشىلۋ سالتاناتىندا ارنايى حات جولداپ، ديماش قۇدايبەرگەننىڭ قازاق مادەنيەتىن الەمگە تانىتۋداعى ءرولىن اتاپ ءوتىپ، جانكۇيەرلەرىنە العىسىن ءبىلدىردى. ءمينيستردىڭ حاتىن مادەنيەت كوميتەتىنىڭ ءتوراعاسى كۇمىس قارساقباي قىزى سەيىتوۆا وقىپ بەردى، حاتتا ديماشتىڭ شىعارماشىلىعى ەلىمىزدىڭ ۇلتتىق ونەرى مەن مادەنيەتىن جاڭا دەڭگەيگە كوتەرگەنى اتاپ ءوتىلدى.
سونداي-اق، اقتوبە وبلىسىنىڭ اكىمى دە ءوز قۇتتىقتاۋ حاتىن جولدادى، بۇل حاتتى وبلىستىڭ ىشكى ساياسات باسقارماسىنىڭ باسشىسى الىبەك مۇقتار ۇلى باينەشوۆ وقىپ بەردى. اكىم ءوز حاتىندا ديماشتىڭ تۋعان جەرىنىڭ ماقتانىشى ەكەنىن جانە ونىڭ الەمدىك ارەناداعى جەتىستىكتەرى اقتوبە ءوڭىرى ءۇشىن ۇلكەن مارتەبە ەكەنىن اتاپ ءوتتى.
كورمەنىڭ اشىلۋ سالتاناتىندا ديماشتىڭ اكەسى، ق ر مادەنيەت قايراتكەرى، ءانشى، كومپوزيتور قانات ايتبايەۆ دا ءسوز سويلەپ، جانكۇيەرلەردىڭ ءاردايىم قولداۋ بىلدىرگەنىنە شىنايى العىسىن ءبىلدىردى. اكەسىنىڭ ايتۋىنشا، مۋزىكا مەن مادەنيەت شەكارا تاڭدامايدى ءارى ادامداردى بىرىكتىرەتىن كۇشكە يە. سونداي-اق، قانات ايتبايەۆ جانكۇيەرلەردىڭ قولداۋى مەن ىقىلاسى ديماشتىڭ ونەر جولىنداعى ەڭ باستى موتيۆاتسيالاردىڭ ءبىرى ەكەندىگىن باسا ايتتى.
سونىمەن قاتار، جانكۇيەرلەر اتىنان ءسوز سويلەگەن كانادادان كەلگەن جاو حانىم ديماشتىڭ شىعارماشىلىعى مەن تۇلعاسىنا دەگەن ماحابباتىن جەتكىزىپ، بۇكىل الەمدەگى جانكۇيەرلەردىڭ ونىڭ ونەرىنە دەگەن شىنايى ىقىلاسىن ءبىلدىردى. جاو حانىمنىڭ ءسوزى كورەرمەندەر تاراپىنان ۇلكەن قولداۋ تاپتى.
كورمەدە بىرنەشە تاقىرىپتىق بولىمدەر ۇسىنىلدى:
«شابىت كوزدەرى» - ءارتىستىڭ بالالىق شاعى، وسكەن ورتاسى جانە شىعارماشىلىق دامۋىن بەينەلەيتىن فوتوسۋرەتتەر مەن زاتتار؛
«داڭققا اپارار جول» - ونىڭ كاسىبي ءبىلىم جولىنداعى ديپلومدارى مەن ءتۇرلى رەسپۋبليكالىق جانە حالىقارالىق بايقاۋلاردا العان ماراپاتتارى؛
«جانكۇيەرلەر ماحابباتى» - الەمنىڭ تۇكپىر-تۇكپىرىنەن ارتىسكە جولدانعان جانكۇيەرلەردىڭ سىيلىقتارى؛
«ۇلت مادەنيەتىنىڭ جارشىسى» - ۇلتتىق مادەنيەت پەن قازاق ونەرىنىڭ الەمدىك ارەنادا تانىلۋىنا ىقپال ەتەتىن ديماشتىڭ ۇلتتىق اسپاپتارى مەن ۇلتتىق كيىمدەرى.
ايتا كەتەيىك، 13-14 -قىركۇيەك كۇندەرى ديماش قۇدايبەرگەن استانادا ەكى كۇن قاتارىنان جەكە كونسەرتىن بەرەدى. بىرەگەي شوۋدى تاماشالاۋعا 50 ەلدەن كورەرمەندەر كەلەدى دەپ كۇتىلىپ وتىر.
اۆتور
دانا نۇرباقىت