ۇلتتىق مۋزەي رەسپۋبليكا كۇنىنە وراي ءداستۇرلى اندەر بايقاۋىن وتكىزدى
استانا. KAZINFORM – ق ر ۇلتتىق مۋزەيىندە «شىرقا، داۋسىم» ءداستۇرلى اندەر بايقاۋى ءوتتى. بۇل شارا مۋزەي پەداگوگيكاسى جانە بالالار شىعارماشىلىعى ءبولىمىنىڭ «شاڭىراق» جوباسى اياسىندا ۇيىمداستىرىلىپ وتىر.
بايقاۋعا استانا قالاسىنىڭ 6-9-سىنىپ وقۋشىلارى قاتىستى. ولار جاندى داۋىستا ءداستۇرلى اندەردى ورىندادى. دالىرەك ايتقاندا، قازاقتىڭ حالىق اندەرى، كەنەن ازىربايەۆتىڭ، باكىر تاجىبايەۆتىڭ، عاريفوللا قۇرمانعاليەۆتىڭ، التىنبەك قورازبايەۆتىڭ شىعارمالارى شىرقالدى.
ءازىل قازى القاسىندا مادەنيەت جانە ونەر قايراتكەرلەرى، مۋزەي قىزمەتكەرلەرىنەن قۇرالدى. ولار قاتىسۋشىلاردىڭ داۋىس ىرعاعىنىڭ تازالىعىن، شىعارما تاقىرىبىنىڭ سايكەستىگىن، ورىنداۋ شەبەرلىگى مەن ساحنا مادەنيەتىن باعالادى.
«قازاق حالقىنىڭ رۋحاني قۇندىلىقتارى ىشىندە ماقتانىش ەتەر باي مۇراسىنىڭ ءبىرى - ءداستۇرلى اندەر. بۇگىن ۇلتتىق مۋزەي ءبىرىنشى رەت ءداستۇرلى ءان بايقاۋىن وتكىزىپ جاتىر، بۇدان كەيىن جىل سايىن تۇراقتى تۇردە وتەتىن بولادى. بىزدە تالانتتى جاستار كوپ، بۇگىن دومبىرامەن جاندى داۋىستا ءان تىڭدايمىز. كوزگە تۇسكەن قابىلەتتى بالالارعا ءارى قاراي كونسەرتتىك باعدارلامالارعا قاتىسۋعا، مۋزىكا مەكتەبىنە تۇسۋگە، ونەرمەن كاسىبي دەڭگەيدە شۇعىلدانۋ جونىندە باعىت-باعدار بەرەمىز. ياعني بۇل جاس تالانتتاردى ىزدەيتىن كونكۋرس»، - دەدى ءادىل قازى القاسىنىڭ مۇشەسى، قازاقستاننىڭ ەڭبەك سىڭىرگەن ءارتىسى، قازاق ۇلتتىق ونەر ۋنيۆەرسيتەتىنىڭ پروفەسسورى بەكبولات بايساعاتوۆ.
ناتيجەسىندە س. ماۋلەنوۆ اتىنداعى №37 مەكتەپ-ليتسەيىنىڭ وقۋشىسى ارۋجان اتىمتاي ع. قۇرمانعاليەۆتىڭ «ءانشى داۋسى» انىمەن باس جۇلدەنى جەڭىپ الدى.
سونىمەن بىرگە، №26 مەكتەپ- گيمنازياسىنىڭ وقۋشىسى، مايرانىڭ ءانىن شىرقاعان انەل شاياحمەتوۆا 1- ورىن، №56 مەكتەپ-ليتسەيىنىڭ وقۋشىسى ارحات ەرباتىر - Ⅱ ورىن جانە ا. قۇنانباي ۇلى اتىنداعى №85 مەكتەپ-ليتسەيىنىڭ وقۋشىسى الۋا سەيىلحان Ⅲ ورىن يەلەندى.
اۆتور
ايجان سەرىكجان قىزى