ديماش قۇدايبەرگەن تاسقىنعا توسقاۋىل قويىپ جۇرگەن ساربازدارمەن كەزدەستى
استانا. KAZINFORM - ۇلتتىق ۇلاننىڭ ۇشقىشتارى سۋ تاسقىنىنا قارسى شارالارعا ۇلكەن ۇلەس قوسىپ جاتىر. بۇگىندە 62 توننادان استام گۋمانيتارلىق جۇك جەتكىزىلدى.
قازىردىڭ وزىندە 5 اسكەري-كولىكتىك ۇشاق پەن تىكۇشاق جۇمىلدىرىلعان. ولار كۇن سايىن گۋمانيتارلىق كومەگىن جەتكىزەدى جانە جەكە قۇرامدى اۋىستىرادى، سۋ تاسقىنى مەن ىقتيمال سۋ باسۋ ورىندارىنا ۇشىراعان اۋماقتى اينالىپ وتەدى.
قازاقستانداعى سۋ تاسقىنى بويىنشا جاعداي كۇردەلى كۇيىندە قالىپ وتىر. اپاتپەن كۇرەستە بارلىق قازاقستاندىق بىرىگىپ جاتىر. سۋ تاسقىنى ايماقتارىندا قوعامدىق ءتارتىپتى قورعاۋ بويىنشا تاۋلىك بويى قىزمەت اتقاراتىن ۇلتتىق ۇلاننىڭ اسكەري قىزمەتشىلەرى دە ۇلكەن كومەك كورسەتەدى. ال تۇتاستاي العاندا سۋ تاسقىنى سالدارىن جويۋ ءۇشىن قۇقىقتىق ءتارتىپ اسكەرلەرىنىڭ جەكە قۇرامىنان 1600-دەن استام اسكەري قىزمەتشى جۇمىلدىرىلعان.
ونىڭ ىشىندە ءاربىر ءتورتىنشىسى - اقتوبە قالاسىندا ورنالاسقان 6655 اسكەري ءبولىمىنىڭ اسكەري قىزمەتشىسى. ولار 4 اۋىسىمدا 17 تەحنيكا بىرلىگىمەن تاۋلىك بويى پوليتسيا قىزمەتكەرلەرىمەن بىرگە كيرپيچنىي جانە زارەچنىي سۋ باسقان كەنتتەرىنىڭ كوشەلەرىندە ۇرلىققا جول بەرمەۋ بويىنشا قىزمەت اتقارىپ جاتىر.
سونداي-اق اقتوبە ۇلاندىقتارى شۇبارقۇدىق جانە ويىل ەلدى مەكەندەرىندە قالپىنا كەلتىرۋ جۇمىستارىن جۇرگىزۋ ءۇشىن اسكەري ءبولىمنىڭ اۆتووتىن قۇيۋشىسىنىڭ كومەگىمەن جانار- جاعارماي ماتەريالدارىن جەتكىزەدى. وتىندى اقتوبە وبلىسىنىڭ اكىمدىگى ۇسىندى.
قازاقستاننىڭ باتىسىندا 5546 اسكەري ءبولىمىنىڭ (اتىراۋ ق. ) 10 اۆتوتەحنيكا بىرلىگىندە 120 ادامنان استام اسكەري قىزمەتشىلەرى سۋ تاسقىنىنا قارسى ءىس-شارالاردى وتكىزۋگە بەلسەندى قاتىسادى. ونىڭ ىشىندە 50 سارباز بەن وفيتسەرلەر 2 اۋىسىمدا قوعامدىق ءتارتىپتى قورعاۋدى قامتاماسىز ەتەدى. ولار پوليتسيا قىزمەتكەرلەرىمەن بىرلەسىپ قۇلسارى قالاسىنىڭ كوشەلەرىندە ۇرلىققا جول بەرمەۋ بويىنشا قىزمەت اتقارادى. سۋ تاسقىنى كەزىندە تىكەلەي كومەك رەتىندە 75 اسكەري قىزمەتشى قاپ دايىندايدى.
ايتا كەتۋ كەرەك، ۇلتتىق ۇلان جاۋىنگەرلەرىنىڭ ەڭبەكقورلىعى قاراپايىم تۇرعىنداردىڭ دا، ءار ءتۇرلى قوعامدىق ۇيىمدار مەن شەنەۋنىكتەردىڭ دە نازارىنان تىس قالمادى. اتىراۋ قالاسىندا جۇرگەندە الەمگە ايگىلى ءانشى جانە مۋلتينسترۋمەنتاليست، قازاقستاننىڭ حالىق ءارتىسى ديماش قۇدايبەرگەن جىلى لەبىزدەرىن ءبىلدىردى.
«قازىرگى ۋاقىتتا ۇلاندىقتاردىڭ ەڭبەگى وتە زور. ءبىزدىڭ حالقىمىزدىڭ بەيبىتشىلىگى مەن قاۋىپسىزدىگى ءۇشىن كۇن مەن تۇندە ەڭبەك ەتۋ ەرلىك دەپ ايتۋ ارتىق ايتقاندىق ەمەس. ۇلاندىقتاردىڭ بۇل ەرلىك ىستەرى ماڭگى ەستە قالادى»، - دەپ اتاپ ءوتتى قازاقستاننىڭ حالىق ءارتىسى.
جالپى، ۇلاندىقتار ەلدىڭ بارلىق سۋ باسقان ايماقتارىنا جاعالاۋدى نىعايتۋ جۇمىستارىنا بەلسەندى قاتىسىپ جاتىر. سۋ تاسقىنىمەن قامتىلعان ەلدى مەكەندەردە سۋ بۇرۋدى جانە كانالداردى تازارتۋدى جۇزەگە اسىرادى. ماسەلەن، بۇگىنگى تاڭدا قۇقىقتىق ءتارتىپ اسكەرلەرىنىڭ اسكەري قىزمەتشىلەرى جالپى ۇزىندىعى 10 شاقىرىمنان اساتىن ارىقتاردى تازارتىپ، ينەرتتى ماتەريالدارى بار 210 مىڭنان استام قاپشىق - قۇم نەمەسە ساز دايىنداپ، توسەلدى.