ۇلتتىق كىتاپ كۇنىنە ارنالعان ءىس-شارالار اپتالىعى باستالدى

استانا. KAZINFORM - ۇلتتىق كىتاپ كۇنى اياسىندا وتەتىن ءىس- شارالار اپتالىعى باستالدى. ق ر مادەنيەت جانە اقپارات مينيسترلىگىنىڭ قولداۋىمەن ق ر ۇلتتىق اكادەميالىق كىتاپحاناسىندا «ۇلت جانە ۇلتتىق كىتاپ» اتتى اشىق ەسىك كۇنى ءوتتى. بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.

- ءىس- شارانىڭ ماقساتى - قالامگەر، كىتاپ جانە وقىرمان اراسىنداعى بايلانىستى نىعايتىپ، مادەني- رۋحاني قۇندىلىقتاردى قوعامعا جان- جاقتى ناسيحاتتاۋ، ينتەللەكتۋالدى جاستاردى ىنتالاندىرۋ، - دەلىنگەن حابارلامادا.

اشىق ەسىك كۇنى اياسىندا كىتاپحاناداعى جاڭارتىلعان كوۆوركينگ ورتالىعىنىڭ سالتاناتتى اشىلۋى ءوتتى. زاماناۋي فورماتتاعى بۇل كەڭىستىك وقىرمانداردىڭ بىرلەسىپ جۇمىس ىستەۋىنە، پىكىر الماسۋىنا، ءبىلىمىن جەتىلدىرۋىنە مۇمكىندىك بەرەدى.

سونداي-اق «كىتاپ - ۇلتتىق قۇندىلىق» اتتى دوڭگەلەك ۇستەل ۇيىمداستىرىلىپ، وتاندىق ادەبيەتتى قولداۋعا باعىتتالعان تاۋەلسىز جوبا - Mecenat.kz ادەبي سىيلىعى تانىستىرىلدى. دوڭگەلەك ۇستەلدە ەستونيا ەلشىسى يااپ ورا، اقىن- دراماتۋرگ بايانعالي ءالىمجانوۆ، پروفەسسور ءاسيما يشانوۆا، جازۋشى نارتاي ساۋدانبەك ۇلى، سىنشى امانگەلدى كەڭشىلىك ۇلى جانە باسقا دا زيالى قاۋىم وكىلدەرى ءسوز سويلەپ، ادەبي شىعارمالار ارقىلى ۇلتتىق ادەبيەتكە قولداۋ كورسەتۋدىڭ ماڭىزىن اتاپ ءوتتى.

سونىمەن قاتار ءىس- شارا اياسىندا ق ر مەملەكەتتىك سىيلىعىنىڭ لاۋرەاتى روزا مۇقانوۆانىڭ «كىتاپ - اقىل نۇرى» اتتى شەبەرلىك ساباعى، «اينادان/زازەركالە» سۋرەت كورمەسى جانە مەكتەپ وقۋشىلارىنا ارنالعان «وزىق وي الاڭى» اتتى book quiz ۇيىمداستىرىلىپ، جۋرناليست مانشۇك شىمىربايدىڭ «Dana. The World Citizen» دەرەكتى فيلمى كورسەتىلدى.

«ۇلتتىق كىتاپ» كۇنىنە وراي ەلىمىزدىڭ بارلىق وڭىرىندە اشىق ەسىك كۇندەرى، كىتاپ فەستيۆالدەرى، كورمە-جارمەڭكەلەر، باسپاگەرلەر جانە كىتاپ دۇكەندەرىمەن بىرلەسكەن جوبالار ۇيىمداستىرىلدى. بۇل اكسيالارعا رەسپۋبليكا بويىنشا 25000 جۋىق ادام قاتىستى.