ۇلتتىق جوبا: اۋىلداردا 96 مەديتسينالىق نىساننىڭ قۇرىلىسى اياقتالدى
استانا. KAZINFORM - اۋىلداردا 655 مەديتسينالىق نىسان سالىنادى. بۇل تۋرالى ءماجىلىستىڭ جالپى وتىرىسىندا پرەمەر- ءمينيستردىڭ ورىنباسارى تامارا دۇيسەنوۆا ءمالىم ەتتى.
«تۇرعىندار نەگىزىنەن اۋىلدىق جەرلەردە مەديتسينالىق مەكەمەلەردىڭ جەتكىلىكسىزدىگى جونىندە سۇراقتار كوتەرگەن. جالپى اۋىل ازاماتتارىن ساپالى مەديتسينالىق كومەكپەن قامتاماسىز ەتۋ ماقساتىندا، مەملەكەت باسشىسىنىڭ تاپسىرماسىنا سايكەس «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى جۇزەگە اسىرىلىپ جاتىر. جوبا اياسىندا قازىر 96 نىساننىڭ قۇرىلىسى اياقتالدى، 321 نىساننىڭ قۇرىلىسى جالعاسىپ كەلەدى. جالپى ولاردىڭ سانىن 655-كە دەيىن جەتكىزۋدى كوزدەپ وتىرمىز»، - دەدى ت. دۇيسەنوۆا.
ونىڭ ايتۋىنشا، اۋدانداردا بىرنەشە ءوڭىردى قامتيتىن كوپسالالى اۋرۋحانالار جاڭعىرتىلىپ وتىر. وبلىستاردا پەريناتالدىق ورتالىقتار سالىنىپ جاتىر جانە رەسپۋبليكادا كولەمىندە جەدەل جاردەم جۇمىسىن رەتتەيتىن ءارى تەلەمەديتسينالىق كونسۋلتاتسيا بەرەتىن ورتالىقتار، سونداي-اق ءىرى ونكولوگيا ورتالىقتارى ىسكە قوسىلىپ جاتىر.
«قازىر بيۋدجەتتىڭ تاپشىلىعىنا قاراماستان، بۇل ماقساتتارعا پرەمەر-ءمينيستردىڭ تاپسىرماسىمەن بيۋدجەتتەن جانە ۇكىمەت رەزەرۆىنەن ءتيىستى قاراجات ءبولىنىپ جاتىر. بۇل باعىت مەنىڭ جەكە باقىلاۋىمدا. اپتا سايىن اكىمدىكتەردىڭ جۇمىسىن قاداعالاپ وتىرمىز»، - دەدى ۆيتسە- پرەمەر.
اۆتور
رۋسلان عابباسوۆ