ۇلتتىق فورما سپورتشىلارىمىزدىڭ كوڭىلىنەن شىقتى - دياس احمەتشارىپ

استانا. KAZINFORM - پاريج وليمپياداسىندا كيەتىن ۇلتتىق فورماسى سپورتشىلارىمىزدىڭ كوڭىلىنەن شىعىپ، قىزىعۋشىلىقتارىن وياتقان.

بۇل تۋرالى kazinform تىلشىسىنە ەكسكليۋزيۆ سۇحبات بەرگەن ق ر تۋريزم جانە سپورت ءمينيسترىنىڭ قوعاممەن بايلانىس جانە ب ا ق جونىندەگى كەڭەسشىسى دياس احمەتشارىپ ايتىپ بەردى.

- دياس مىرزا، پاريج وليمپياداسىنىڭ باستالۋىنا ساناۋلى عانا كۇندەر قالدى. بيىلعى وليمپيادا ويىندارىنا ارناپ تىگىلگەن ۇلتتىق فورما سپورتشىلارىمىزدىڭ قولىنا ءتيدى ما؟

- ءيا، فرانسيا استاناسى پاريج قالاسىندا وتەتىنХХХІІІ جازعى وليمپيادا ويىندارىنىڭ باستالۋىنا نەبارى ەكى اپتا ۋاقىت قالدى. ءبىز سپورتشىلارىمىزعا ارناپ ارنايى تىگىلگەن ۇلتتىق فورمالارىمىزدى بىرتىندەپ تاراتا باستادىق. وليمپياداعا جولداما العان سپورتشىلارىمىزدىڭ باسىم بولىگى ەۋروپا ەلدەرىندە سوڭعى وقۋ-جاۆتتىعۋ جيىندارىن وتكىزۋدە. وعان باستى سەبەپ -سپورتشىلارىمىز پاريجگە جەتۋگە وتە ىڭعايلى بولۋ ءۇشىن ارنايى وقۋ-جاتتىعۋ جۇمىستارى سولاي جوسپارلانعان.

ءبىز ول جاقتاعى سپورتشىلارىمىزعا فورمالارىن ارنايى جەتكىزىپ بەرىپ جاتىرمىز. ال ەلىمىزدە جاتتىعىپ جاتقان سپورتشىلارىمىزعا وسىدان ءبىرقانشا كۇن بۇرىن تاراتتىق.

وسىدان بىرەر كۇن بۇرىن مەملەكەت باسشىسى قاسىم-جومارت توقايەۆ سپورتشىلارىمزعا مەملەكەتتىك تۋدى تاپسىرعاندا اتلەتتەرىمىز سپورتتىق فورماسىن كيىپ باردى. ءبىرىنشى بولىپ فورمانى بوكسشىلار، دزيۋدوشىلارىمىز جانە جەڭىل اتلەتتەرىمىز قولدارىنا العان بولاتىن.

سپورتشىلارىمىزدىڭ العاشقى لەگى 20 شىلدەدە پاريجگە اتتانادى. وعان دەيىن بارلىعى كيىممەن قامتاماسىز ەتىلەدى.

- سپورتشىلارىمىز ۇلتتىق فورمانى قالاي قابىلدادى؟ ۇناتتى ما؟

- ارينە، بىردەن ۇناتتى، كوڭىلدەرىنەن شىقتى. سەبەبى - فورما وتە ساپالى ماتەريالدان، سپورتشىلارىمىزعا ىڭعايلى ەتىلىپ تىگىلگەن. وليمپيادا ويىندارى تۇسىندا پاريج قالاسى وتە ىستىق بولۋى مۇمكىن. سول سەبەپتى ءبىز كيىمنىڭ ماتاسىنا ەرەكشە نازار اۋداردىق. ىستىقتا اۋا وتەتىندەي، تەرلەگەندە دەنەگە جابىسىپ، ءجۇرىپ- تۇرعاندا تىرىسىپ قالمايتىىنداي وتە جەڭىل، دەنەگە بارىنشا ىڭعايلى ماتانى تاڭدادىق.

ديزايىنىن دا وسىعان دەيىن تانىستىرعاندا وزدەرىڭىز كوردىڭىزدەر. تىگىسى دە وتە ساپالى شىقتى. سودان دا بولار فورمانى العان سپورتشىلارىمىز وتە جوعارى دەڭگەيدە باعالاپ، رازىلىقتارىن ءبىلدىردى.

ءتىپتى، «مىنا فورمانى كيىپ بارىپ، جۇلدەسىز كەلۋ مۇمكىن ەمەس» دەپ ايتىپ جاتىر. لايىم، سولاي بولعاي، جەتىستىگىمىز كوپ بولسىن دەپ تىلەي بەرەيىك.. .

- جالپى، بيىلعى وليمپيادا فورماسى نەسىمەن ەرەكشەلەنەدى؟

- ءبىز پاريج وليمپياداسىنىڭ فورماسىن تىكتىرۋ بارىسىندا وتكەن جىلعى ازيا ويىندارىنداعى ولقىلىقتاردى ەسكەردىك. سول ءۇشىن ارنايى كوميسسيا قۇردىق. ونىڭ قۇرامىنا بۇرىنعى وليمپيادا چەمپيوندارى، قازىرگى سپورتشىلار مەن باپكەرلەر، جۋرناليستەر، مينيسترلىك وكىلدەرى، بەلگىلى قوعام قايراتكەرلەرى كىردى.

ءبىرىنشى كەزەڭدە ۇمىتكەرلەردىڭ ۇسىنعان جۇمىسى كوميسسيا مۇشەلەرىنىڭ كوڭىلىنەن شىقپادى. ەكىنشى كەزەڭدە 15 جۇمىس ۇسىنىلىپ، سونىڭ ىشىنەن ەڭ ۇزدىگىن اشىق تۇردە كوميسسيا مۇشەلەرى داۋىسقا سالىپ تاڭداپ الدى. ناتيجەسىندە تاڭداپ الىنعان ەكى كومپانيا فورمانىڭ ءۇش ءتۇرىن تىگىپ بەردى. ونىڭ ىشىندە سپورتتىق فورما، جارىس فورماسى، سونداي-اق، وليمپيادا ويىندارىنىڭ سالتاناتتى اشىلۋ جانە جابىلۋ راسىمىندە كيەتىن ارنايى فورما بار.

پارادتىق فورمانىڭ جەڭىن ارنايى قىسقا قىلىپ تىكتىردىك. سەبەبى، پاريجدە اۋا رايى وتە ىستىق بولاتىندىقتان ءبىز سولاي شەشىم قابىلدادىق. ەڭ باستىسى ۇلتتىق فورمامىز سپورتشىلارىمىزعا ۇنادى.

- اڭگىمەڭىزگە راحمەت!

اۆتور

كۇنسۇلتان وتارباي