ۇلتتىق بانك: تەڭگەنىڭ قۇنسىزدانۋىنا ىرگەلى سەبەپتەر جوق

استانا. KAZINFORM - تەڭگە باعامىنىڭ قازىرگى جاعدايىنا بايلانىستى ۇلتتىق بانك ءتوراعاسىنىڭ ورىنباسارى ءاليا مولدابەكوۆا تۇسىنىكتەمە بەردى. بۇل تۋرالى Kapital.kz سايتى جازدى.

ونىڭ ايتۋىنشا، تەڭگەنىڭ السىرەۋى نەگىزىنەن نارىقتىق فاكتورلارمەن بايلانىستى، دەگەنمەن ىرگەلى (فۋندامەنتالدى) جاعدايلار ءالى دە قولايلى كۇيىندە قالىپ وتىر.

- قازىرگى ۋاقىتتا ىرگەلى فاكتورلار تەڭگەنىڭ السىرەۋىن بولجاۋعا نەگىز بەرمەيدى. مۇناي باعاسى سالىستىرمالى تۇردە جوعارى دەڭگەيدە ساقتالىپ تۇر. الەمدىك نارىقتاردا ا ق ش دوللارىنىڭ دامىعان جانە دامۋشى ەلدەردىڭ ۆاليۋتالارىنا قاتىستى السىرەۋى بايقالادى. سىرتقى كۇيزەلىستەر جوق. وسىعان بايلانىستى تەڭگەنىڭ قازىرگى باعامى ىرگەلى تۇرعىدان تومەن باعالانعان دەپ ەسەپتەلەدى، - دەدى مولدابەكوۆا.

سونىمەن قاتار، بيۋدجەت شىعىندارى مەن يمپورتقا تولەمدەر كولەمى ارتقان. ءىرى كومپانيالاردىڭ شەتەلدىك بيرجالاردا ورنالاستىرىلعان دەپوزيتارلىق جازبالار بويىنشا ديۆيدەندتەر تولەۋى دە تەڭگە باعامىنا قوسىمشا قىسىم كورسەتەدى، سەبەبى بۇل تولەمدەر شەتەل ۆاليۋتاسىنا ايىرباستاۋدى تالاپ ەتەدى. سونداي-اق، جاز مەزگىلىندە حالىقتىڭ شەتەلدىك ساپارلارعا ءجيى شىعۋىنا بايلانىستى ۆاليۋتاعا دەگەن سۇرانىس ارتادى.

- بۇل پروتسەستەردىڭ جيىنتىعى قازىرگى ۋاقىتتا تەڭگە باعامىنىڭ ماۋسىمدىق السىرەۋىنە الىپ كەلىپ وتىر. ادەتتە، مۇنداي اۋىتقۋلار قالىپتى جانە قىسقا مەرزىمدى سيپاتقا يە، ءارى نارىقتاعى سۇرانىس پەن ۇسىنىستىڭ تابيعي وزگەرىستەرىن كورسەتەدى. سپەكۋلياتيۆتىك فاكتورلارعا كەلسەك، قازىرگى ۋاقىتتا ولاردىڭ نارىققا ىقپالى بايقالمايدى. قاتىسۋشىلار ايىرباستاۋ باعامىن وزدەرى قالىپتاستىرادى، ال نارىقتا قىسقا مەرزىمدى فاكتورلار باسىم بولىپ وتىر، - دەپ اتاپ ءوتتى ۇلتتىق بانك ءتوراعاسىنىڭ ورىنباسارى.

سونىمەن قاتار، ۇلتتىق بانك قاجەت بولعان جاعدايدا الدىن الا شارالار قابىلداۋعا دايىن ەكەنىن مالىمدەدى.

- ەگەر الىپساتارلىق وپەراتسيالاردىڭ بەلگىلەرى بايقالسا، ۇلتتىق بانك نارىقتاعى شامادان تىس قۇبىلمالىلىقتىڭ الدىن الۋ ماقساتىندا ۆاليۋتا ينتەرۆەنتسيالارىن جۇرگىزۋگە دايىن، - دەدى ءا. مولدابەكوۆا.

ونىڭ ايتۋىنشا، قازىرگى ۋاقىتتا حالىقارالىق رەزەرۆتەر كولەمى ۆاليۋتا نارىعىنداعى جاعدايدى تۇراقتاندىرۋعا تولىق جەتكىلىكتى.

- ۇلتتىق بانك كۆازيمەملەكەتتىك سەكتور كومپانيالارى تاراپىنان شەتەل ۆاليۋتاسىن قوسىمشا ساتۋدى قامتاماسىز ەتۋ شارالارىن جۇزەگە اسىرۋدا. جاقىن ارادا مۇنداي كومپانيالاردىڭ ءبىرى شەتەلدىك ينۆەستورلاردان الىنعان قارىز ەسەبىنەن ەداۋىر كولەمدە ۆاليۋتا ساتۋدى جوسپارلاپ وتىر. بۇل ۆاليۋتا نارىعىنداعى تەڭگەرىمدىلىككە وڭ اسەر ەتەدى، - دەپ تۇيىندەدى ءاليا مولدابەكوۆا.

ەسكە سالا كەتەيىك، بۇعان دەيىن قور بيرجاسىندا دوللار تاعى 3 تەڭگەگە قىمباتتاعانىن جازعان ەدىك.