ۇلتتىق بانك «قازاتومونەركاسىپ» ا ق اكتسيالارىن ساتىپ الماقشى
استانا. KAZINFORM - قازاقستان رەسپۋبليكاسىنىڭ ۇكىمەتى رەسپۋبليكالىق بيۋدجەتتى قارجىلاندىرۋ ماقساتىندا ۇلتتىق قورعا (بۇدان ءارى – ۇ ق) جالپى سوماسى 467,4 ميلليارد تەڭگەگە «قازاتومونەركاسىپ» ا ق اكسيالارىن ساتىپ الۋ تۋرالى شەشىم قابىلدادى. بۇل تۋرالى ۇلتتىق بانكتىڭ باسپا ءسوز قىزمەتى ءمالىم ەتتى.
وسى شەشىمدى ىسكە اسىرۋ اياسىندا ۇ ق قاراجاتىن باسقارۋشى رەتىندە قازاقستان رەسپۋبليكاسىنىڭ ۇلتتىق بانكىنە (ق ۇ ب) ۇلتتىق قوردان شامامەن 970 ميلليون ا ق ش دوللارى سوماسىنا شەتەل ۆاليۋتاسىن تەڭگەگە ايىرباستاۋدى جۇزەگە اسىرادى.
وپەراتسيانىڭ جوسپاردان تىس سيپاتىن ەسكەرە وتىرىپ، كورسەتىلگەن كولەمدى قىسقا ۋاقىت ارالىعىندا ساتۋ ۆاليۋتا نارىعىنىڭ تەڭگەرىمدىلىگىنە ەلەۋلى اسەر ەتۋى مۇمكىن.
«وسىعان بايلانىستى ۇلتتىق بانكتىڭ التىن- ۆاليۋتا رەزەرۆتەرىنە ۇ ق اكتيۆتەرىن تىكەلەي ساتۋ ارقىلى ۇلتتىق بانك ءبىرجولعى كونۆەرسيالىق وپەراتسيا جۇرگىزۋگە نيەتتى. سونىمەن بىرگە نارىقتىق بەيتاراپتىلىقتى ساقتاۋ ماقساتىندا جانە وسى وپەراتسيانى ۆاليۋتا نارىعىنا شىعارۋ اياسىندا ۇلتتىق بانك ۆاليۋتا نارىعىندا وسى كولەمدى بىركەلكى ساتۋدى جۇزەگە اسىرۋدى جوسپارلاپ وتىر. وسىلايشا، وسى جىلدىڭ شىلدەسىنەن باستاپ ۇلتتىق بانك 4 اي ىشىندە 970 ميلليون ا ق ش دوللارىن ساتۋعا كىرىسەدى، ايىنا 243 ميلليون ا ق ش دوللارى كولەمىندە ايىرباستالادى»، - دەلىنگەن حابارلامادا.
بۇل شارا ۆاليۋتا نارىعىنا ءبىرجولعى كونۆەرسيالىق وپەراتسيانىڭ اسەرىن بەيتاراپتاندىرۋدى قامتاماسىز ەتۋگە ارنالعان ەرەكشە شارا بولىپ تابىلادى.
ۆاليۋتا نارىعىنداعى ساتۋ كولەمى ۇلتتىق بانكتىڭ ستاتيستيكالىق اقپاراتىنىڭ شىعۋ كەستەسىنە سايكەس جاريالاناتىن بولادى.
ترانسپارەنتتىلىك جانە اشىقتىق قاعيداتى اياسىندا ۇلتتىق بانك ۆاليۋتا نارىعىندا جۇرگىزىلەتىن بارلىق وپەراتسيا تۋرالى تولىق اقپاراتتى جاريالاۋدى جالعاستىرادى.