ۇلتتىق بانك قازاقستاندا 2024 -جىلى ينفلياتسيا قانشا پايىز بولاتىنىن ايتتى
استانا. KAZINFORM - قازاقستان ۇلتتىق بانكى ساراپشىلار قاۋىمداستىعى اراسىندا جۇرگىزىلگەن كەزەكتى ماكروەكونوميكالىق ساۋالنامانىڭ ناتيجەسىن جاريالادى.
ءمالىم بولعانداي، ساۋالناما جۇرگىزگەندە Brent ماركالى مۇنايدىڭ باعاسى، قازاقستان ەكونوميكاسىنىڭ ءوسىمى، ينفلياتسيا، بازالىق مولشەرلەمە، تاۋارلار مەن قىزمەتتەردىڭ ەكسپورتى مەن يمپورتى، سونداي-اق ۇلتتىق ۆاليۋتا باعامى سىندى نەگىزگى پارامەترلەر ەسكەرىلگەن.
«وسى جىلدىڭ تامىز ايىندا مۇناي باعاسىنا قاتىستى سەناري شارتتارى ايتارلىقتاي وزگەرىسكە ۇشىرامادى. رەسپوندەنتتەردىڭ مەديانالىق كۇتۋلەرى بويىنشا، 2024 -جىلى Brent ماركالى مۇنايدىڭ باعاسى ورتاشا ەسەپپەن باررەلىنە 83,5 ا ق ش دولل. دەڭگەيىندە قالىپتاسادى (بۇعان دەيىن - 83,7 ا ق ش دولل. ). 2025 جانە 2026 -جىلعى كۇتۋلەر 80,0 ا ق ش دولل. دەڭگەيىندە ساقتالىپ وتىر»، - دەپ حابارلادى بانكتىڭ باسپا ءسوز قىزمەتى.
ال 2024 جانە 2026 -جىلدارعا ارنالعان قازاقستان ەكونوميكاسىنا قاتىستى بولجام 4,0 پايىز (بۇدان بۇرىن - 4,1 پايىز) جانە 4,4 پايىزعا (بۇدان بۇرىن - 4,5 پايىز) دەيىن ازداپ قايتا قارالعان. 2025 -جىلى، بۇرىنعىداي 5,0 پايىز دەڭگەيىندە ءوسىم كۇتىلىپ وتىر.
2024 جانە 2026 -جىلدارى ينفلياتسيا 8,0 پايىز جانە 6,0 پايىز دەڭگەيىندە كۇتىلەدى. 2025 -جىلعا ارنالعان بولجام 6,8 پايىزدان 6,9 پايىزعا دەيىن ازداپ ناشارلادى.
«ساراپشىلاردىڭ 2025 -جىلعا ارنالعان بازالىق مولشەرلەمە دەڭگەيى بويىنشا كۇتۋلەرى 11,0 پايىزدان 11,9 پايىزعا دەيىن قايتا قارالعان. 2024 -جىلعا ارنالعان بازالىق مولشەرلەمە بولجامدارىنىڭ مەديانالىق ماندەرى 14,4 پايىزدان 14,5 پايىزعا دەيىن ءبىرشاما جوعارىلادى. 2026 -جىلعا ارنالعان باعالاۋلار وزگەرگەن جوق»، - دەلىنگەن حابارلامادا.
ساۋالناماعا قازاقستان اۋماعىندا ماكروەكونوميكالىق كورسەتكىشتەردى تالداۋمەن جانە بولجاۋمەن اينالىساتىن 14 ۇيىم قاتىسقان. رەسپوندەنتتەردىڭ قاتارىنا نارىقتىڭ كاسىبي قاتىسۋشىلارى، زەرتتەۋ ينستيتۋتتارى جانە حالىقارالىق ۇيىمدار مەن رەيتينگتىك اگەنتتىكتەر كىرەدى.
بەلگىلى بولعانداي ماكروەكونوميكالىق ساۋالناماعا ۇلتتىق بانك بولجامدارى كىرمەيدى. وندا ىشكى جانە الەمدىك نارىقتارداعى احۋالدىڭ دامۋىنا قاتىستى نارىقتىڭ كاسىبي قاتىسۋشىلارىنىڭ دەربەس پىكىرىنە، باعالاۋلارى مەن كۇتۋلەرىنە شولۋ جاسالىپ وتىر.