قاعيدالارعا سايكەس، ۇلتتىق بانك سيفرلىق تەڭگە پلاتفورماسىنىڭ وپەراتورى بولىپ تابىلادى جانە پلاتفورما قاتىسۋشىلارى ەنگىزگەن قاراجات كولەمى شەگىندە سيفرلىق ۆاليۋتانى اينالىمعا شىعارادى. سونىمەن قاتار سيفرلىق تەڭگە ەميسسياسى قاراجات قاتىسۋشىنىڭ سيفرلىق شوتىنا ەسەپتەلگەن ساتتەن جۇزەگە اسىرىلدى دەپ ەسەپتەلەدى.
ايتا كەتۋ كەرەك، سيفرلىق تەڭگەنىڭ اينالىمى ۇلتتىق ۆاليۋتاداعى ارنايى پلاتفورمادا عانا جۇزەگە اسىرىلادى. سونىمەن قاتار تەحنيكالىق تالاپتار ساقتالعان جاعدايدا سيفرلىق قاراجاتتى سىرتقى ەلەكتروندىق تاسىمالداعىشتاردا ساقتاۋعا رۇقسات ەتىلەدى.
سونداي-اق سيفرلىق تەڭگەنى وتەۋ كەرى وپەراتسيا ارقىلى جۇرگىزىلەدى وعان سايكەس بالامالى اقشا سوماسى قاتىسۋشىلاردىڭ ۇلتتىق بانكتەگى كوررەسپوندەنتتىك شوتتارىنا اۋدارىلادى.
قاعيدالاردا ءبىرقاتار شەكتەۋلەر دە قاراستىرىلعان. اتاپ ايتقاندا، ءبىر پايدالانۋشىعا تەك ءبىر عانا سيفرلىق شوت اشۋعا بولادى، سونداي-اق جيناقتاۋشى سيفرلىق شوتتاردى اشۋعا جول بەرىلمەيدى.
بۇدان بولەك، پلاتفورما قاتىسۋشىلارى وپەراتورعا پايدالانۋشىلار سانى مەن سيفرلىق تەڭگە قالدىقتارىنىڭ كولەمى تۋرالى دەرەكتەردى قوسا العاندا، ەسەپتىلىكتى ۇسىنۋعا مىندەتتى.
قۇجات بيىل 19-شىلدەدەن باستاپ قولدانىسقا ەنگىزىلەدى.
بۇعان دەيىن قازاقستان رەسپۋبليكاسىنىڭ ۇلتتىق بانكى تەڭگەنىڭ شەتەل ۆاليۋتالارىنا قاتىستى رەسمي باعامىن ايقىنداۋ قاعيدالارىنا وزگەرىستەر جوباسىن «اشىق ن ق ا» پورتالىنا جاريالاعان ەدى.