ەلسيار قاناعاتوۆ قازاق دزيۋدوشىلارى وليمپياداعا قالاي تاڭدالاتىنىن ايتتى

استانا. KAZINFORM - وليمپيادا ويىندارىنا دايىندىق جونىندەگى شتاب باسشىسى ەلسيار قاناعاتوۆ قازاق دزيۋدوشىلارى وليمپياداعا قالاي تاڭدالاتىنىن ايتىپ بەردى.

«فرانسيا استاناسى پاريج قالاسىندا وتەتىن وليمپيادا ويىندارىنا ەلىمىزدىڭ اتىنان قاتىساتىن دزيۋدوشىلار انىقتالاتىن كۇن دە الىس ەمەس. قازىرگى تاڭدا الەمنىڭ ءار تۇكپىرىندە وليمپيادالىق رەيتينگىلىك تۋرنيرلەر ءوتىپ جاتىر. ولاردىڭ قاتارىندا قازاقستاندىق تاتامي شەبەرلەرى دە بار. وليمپياداعا باراتىن دزيۋدوشىلار وسى رەيتيننگ ارقىلى انىقتالادى. ناقتىراق ايتساق، ءار سالماقتان وليمپيادالىق رەيتينگتە الدىڭعى 17-ورىنعا كوتەرىلگەن دزيۋدوشىلار بارا الادى. قازىرگى تاڭدا بۇل كورسەتكىشكە ۇپايلارى جەتىپ تۇرعان ەرلەر اراسىندا دا، ايەلدەر اراسىندا دا سپورتشىلارىمىز بار. سوندىقتان دزيۋدودان دا كەمى 6-7 جولداما الامىز دەپ ويلايمىن. قازىر ەشكىمنىڭ اتىن اتاپ، ءتۇسىن تۇستەۋدىڭ قاجەتى جوق. سەبەبى، وليمپيادالىق رەيتنيگ ءار جارىس سايىن وزگەرىپ وتىرادى. ەڭ باستىسى سپورتشىلارىمىز سول باسەكەلەردە ۇزدىك ونەر كورسەتە بىلۋلەرى كەرەك»، - دەدى ەلسيار قاناعاتوۆ.

سونىمەن قاتار شتاب باسشىسى قازاق دزيۋدوشىلارىن الدا تاعى دا ءبىر قاتار ماڭىزدى جارىستار كۇتىپ تۇرعانىن، وندا وليمپياداعا ۇپايلارى بەرىلەتىنىن دە اتاپ ءوتتى.

«ءبىزدىڭ دزيۋدوشىلارعا ءالى دە كوپتەگەن مۇمكىندىكتەر بار. الداعى كۇندەرى، ياعني 3-5-مامىر ارالىعىندا دۋشانبەدە، «ۇلكەن دۋلىعا» تۋرنيرى، 10-12-مامىر ارالىعىندا ەلوردامىزدا «قازاقستان بارىسى» ۇلكەن دۋلىعا دوداسى، 19-24-مامىر ارالىعىندا ابۋ-دابيدە الەم چەمپيوناتى وتەدى. سوندىقتان دزيۋدوشىلارىمىزعا ءالى دە وليمپيادالىق ۇپايلارىن جاقسارتۋعا ۇلكەن مۇمكىندىكتەرى بار»، - دەدى شىتاب باسشىسى.

ەستەرىڭىزگە سالا كەتەيىك، 3-5-مامىر كۇندەرى تاجىكستان استاناسى دۋشانبە قالاسىندا وتەتىن دزيۋدودان Grand Slam تۋرنيرىندە ەل نامىسىن ەرلەر قۇراماسىنان كىمدەر قورعايتىنىن جازعان بولاتىنبىز.

اۆتور كۇنسۇلتان وتارباي