ەلسيار قاناعاتوۆ: بەس كۇندە 15 جولداما جەڭىپ الدىق، بۇل ۇلكەن - ناتيجە
استانا. KAZINFORM - قازاقستان سپورتشىلارى فرانسيا استاناسى پاريج قالاسىندا وتەتىن XXXIII جازعى وليمپيادا ويىندارىنا سوڭعى بەس كۇندە 15 جولداما جەڭىپ الدى. بۇل - ۇلكەن ناتيجە. بۇل تۋرالى Kazinform تىلشىسىنە وليمپيادا ويىندارىنا دايىندىق جونىندەگى شتاب باسشىسى ەلسيار قاناعاتوۆ ايتىپ بەردى.
«وزدەرىڭىز كورىپ-ءبىلىپ، جازىپ-سىزىپ وتىرعانداي، سوڭعى بەس كۇندە قازاق سپورتشىلارى پاريج وليمپياداسىنا 15 جولداما جەڭىپ الدى. بۇل - ۇلكەن ناتيجە. ولاي دەيتىنىمىز ءالى كۇنگە وليمپياداعا 15 جولداما الا الماي كەلە جاتقان ەلدەر دە جوق ەمەس. 19-23-ءساۋىر ارالىعىندا جاپونيا استاناسى توكيو قالاسىندا بايداركا مەن كانوەدە ەسۋدەن قازاقستان كومانداسى ازيا چەمپيوناتىندا التى جولداماعا قول جەتكىزسە، بىشكەكتە كۇرەس تۇرلەرىنەن وتكەن ازيا ايماقتىق ىرىكتەۋ جارىسىندا ەركىن كۇرەس شەبەرلەرى ەكى، گرەك-ريم بالۋاندارى ءۇش جولداماعا قول جەتكىزدى. سونىمەن قاتار وڭتۇستىك كورەيانىڭ چۋندجۋ قالاسىندا اكادەميالىق ەسۋدەن وليمپياداعا ىرىكتەۋ تۋرنيرىندە ۆلاديسلاۆ ياكوۆليەۆ تاعى ءبىر جولدامانى جەڭىپ الدى. تاعى ءبىر اتلەتىمىز ناريمان كۋربانوۆ دوحاداعى الەم كۋبوگى كەزەڭىندە سپورتتىق گيمناستيكادان ەل قورجىنىنا كەزەكتى جولدمانى سىيلادى. وڭتۇستىك كورەيانىڭ چۋندجۋ قالاسىندا اكادەميالىق ەسۋدەن وليمپيادالىق ىرىكتەۋدە وتانداسىمىز ۆلاديسلاۆ ياكوۆليەۆتا ءوز ماقساتىنا جەتتى. ال كەشە عانا تاعى ءبىر ءسۇيىنشىلى حابار جەتتى. ستەند اتۋدان قازاقستاندىق ماريا دميتريەنكو دوحادا وتكەن وليمپياداعا ىرىكتەۋ تۋرنيرىندە ەل قورجىنىنا 47-جولدامانى سالدى»، - دەدى شتاب باسشىسى.
سونداي-اق، شتاپ باسشىسى الدا ءالى 30 عا جۋىق ليتسەنزيالىق تۋرنيرلەر بار ەكەنىن ايتا كەلە جالپى جولدمالار سانى 80 گە جۋىقتاپ قالاتىنىن ايتىپ بەردى.
«قازاق سپورتشىلارىن الدا ءالى دە 30 عا جۋىق ليتسەنزيالىق تۋرنيرلەر كۇتىپ تۇر. دەمەك، قازاقستاندىقتاردىڭ جولدامالار سانى وسىمەن توقتاپ قالمايدى. جالپى 80 گە جۋىق ليتسەنزيا الدۋدى كوزدەپ وتىرمىز. سول ماقساتتا سپورتشىلارمەن دە، باپكەرلەرمەن دە تىعىز بايلانىستا جۇمىس اتقارىلىپ، جوسپارلار جاسالىپ جاتىر»، - دەدى ەلسيار قاناعاتوۆ.
ەستەرىڭىزگە سالا كەتەيىك، وسىدان ءبىر كۇن بۇرىن ستەند اتۋدان قاتار استاناسى دوحادا ءوتىپ جاتقان ليتسەنزيالىق تۋرنيردە ۇلتتىق قۇراما سپورتشىسى ماريا دميتريەنكو ەل قورجىنىنا 47-جولدامانى سىيلاعانىن جازعان بولاتىنبىز.
اۆتور كۇنسۇلتان وتارباي