لەنين كەنتى - اتامەكەن: پاۆلودار وبلىسىنىڭ سولتۇستىك وڭىرلەرى قازاقشا اتالا باستادى

پاۆلودار وبلىسىندا بىرنەشە اۋىلدىق ەلدى مەكەننىڭ اتاۋى وزگەرەدى دەپ حابارلايدى Kazinform.

وبلىستىق ءماسليحاتتىڭ كەزەكتەن تىس سەسسياسىندا وڭىرلىك مادەنيەت، تىلدەردى دامىتۋ جانە ارحيۆ ءىسى باسقارماسىنىڭ كەيبىر اۋىل اتاۋلارىن قازاقشالاندىرۋ تۋرالى ۇسىنىسى قولداۋ تاپتى. اتاپ ايتقاندا، بۇدان بىلاي پاۆلودار قالاسىنىڭ ىرگەسىندەگى لەنين كەنتى - اتامەكەن، جەلەزين اۋدانىنداعى وزەرنوە اۋىلدىق وكرۋگى - مايلى، تەرەڭكول اۋدانىنداعى بوبروۆكا اۋىلدىق وكرۋگى - جاڭابەت، فەدوروۆكا وكرۋگى - تومارلى، ۆەرنەنكا وكرۋگى - التاي اۋىلدىق وكرۋگى، لۆوۆكا - التاي، ۆوسكرەسەنكا - اۋليەاعاش، بەرەزوۆكا اۋىلى اققايىڭ دەپ اتالادى. ال تروفيموۆكا اۋىلى قورجىنكول دەگەن اتاۋدى يەلەنبەك.

اتاپ وتۋگە تۇرارلىق جايت، ەرتەرەكتە جەتىنشى اۋىل، ودان سوڭ ۇزاق جىلدار «لەنينسكي» دەپ اتانعان كەنت وبلىس ورتالىعى ءۇشىن گەوگرافيالىق تۇرعىدان اسا ماڭىزعا يە. كەنت رەتىندە نەگىزى 1914 -جىلى قالانىپ، بيدايىق دەپ اتالاتىن جەردە №7 اۋىل قۇرىلادى.

ال 1965 -جىلى پرولەتاريات كوسەمىنىڭ اتى بەرىلدى. كەڭەس زامانىنان پاۆلودار قالاسىنا قارايتىن كەنتكە تاۋەلسىزدىك جىلدارى اۋىلداردان كوپ وتباسىلار كوشىپ كەلدى. سوڭعى 30 جىلدا حالىق سانى ءوسىپ، قازاقتىڭ دا قاتارى ارتتى.

ستاتيستيكالىق دەرەكتەرگە سۇيەنسەك، بۇگىندە مۇندا 10050 ادام تۇرادى. ونىڭ تەڭ جارتىسى - قانداستارىمىز.

جالپى، كەنت كوپۇلتتى بولعاندىقتان با، ونىڭ اتاۋىن وزگەرتۋ ماسەلەسى كوپكە دەيىن جەرگىلىكتى قاۋىم تاراپىنان قارسىلىققا ۇشىراي بەردى. اۋىل اقساقالدارى مەن باس كوتەرەر ازاماتتارى بىرنەشە مارتە قازانعاپ ءبيدىڭ اتىن بەرگىسى كەلىپ، ۇسىنىس جاساعانىمەن حالقىمىزدىڭ وتكەن تاريحىن ونشا-مۇنشا بىلمەيتىن جەرگىلىكتى جۇرت بۇل باستامادان ءۇزىلدى-كەسىلدى باس تارتتى.

ايتپەسە، ⅩⅨ عاسىردا ءومىر سۇرگەن ورتا ءجۇزدىڭ بەلگىلى ءبيى، باياناۋىل سىرتقى وكرۋگىنىڭ اعا سۇلتانى بولعان قازانعاپ ساتىبالدى ۇلىنىڭ ءومىر جولى بۇل ولكەمەن تىعىز بايلانىستى. زيراتى دا اۋىلدان الىس ەمەس.

يدەولوگيالىق تۇرعىدان ابدەن ەسكىرگەن «لەنينسكي» اتاۋىن كارتادان سىزىپ تاستاۋعا تالپىنعان قوعام بەلسەندىلەرى بۇل جولى كەنتكە 6 ءتۇرلى نۇسقا ۇسىندى. ولار - قازانعاپ، بيدايىق، اتامەكەن، ىنتىماق، قازىنا جانە جەتىنشى اۋىل.

قورىتىندى جيىندا قازانعاپ بي مەن اتامەكەن اتاۋلارى قالىپ، جەرگىلىكتى قاۋىمداستىقتىڭ 50 مۇشەسىنىڭ 49-ى «اتامەكەنگە» داۋىس بەردى. وسىلايشا حالىقتىڭ قالاۋى «اتامەكەن» بولىپ وتىر.

اۆتور

مۇرات اياعان