گۇلميرا ساتىبالدى وزىنە تاعىلعان ايىپپەن كەلىسپەيدى
الماتى. KAZINFORM - الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا گۇلميرا ساتىبالدى مەن ونىڭ بۇرىنعى جۇرگىزۋشىسى ءمادي باتىرشايەۆقا قاتىستى سوت وتىرىسى جالعاسىپ جاتىر.
«مەن تاعىلعان ايىپپەن كەلىسپەيمىن. ءجۇنىسوۆتىڭ زاڭسىز بەرگەن ارىزىن ءبىزدىڭ قۇقىق قورعاۋ ورگاندارى ادىلەتتى تۇردە زەرتتەپ، رەتتەيدى دەپ سەنىپ، تەرگەۋ اياسىندا كۋالىك بەرگەن جوقپىن»، - دەپ باستادى ءسوزىن ايىپتالۋشى.
ايتۋىنشا، جابىرلەنۋشى كاسىپكەر اباي جۇنىسوۆكە وسىدان 20 جىل بۇرىن ءسىڭلىسى تۇرمىسقا شىققان.
«اباي ءجۇنىسوۆ ۇزاق جىل مەنىڭ قارت اتا-انامنىڭ ۇيىندە بىرگە تۇردى. تۋىستارىم ءجۇنىسوۆ پەن بەلگىلى كاسىپكەر د. ىدىرىسوۆ اراسىنداعى جانجالدى شەشۋگە كومەكتەستى. سەبەبى ىدىرىسوۆ ابايدى اقشا جىمقىردى دەپ ايىپتادى. مەن كۇيەۋ بالامدى ايادىم. جيەندەرىم مەن ءسىڭىلىمدى ويلاپ، ونىڭ بارلىق قارىزىن جاۋىپ، قايتا كاسىپ باستاۋىنا كومەكتەستىم. «ءداۋىر» كومپانياسىنا جۇمىسقا تۇرعىزدىم»، - دەدى ول.
گ. ساتىبالدى اباي ءجۇنىسوۆ ەكەۋى بىرلەسكەن كاسىپتى قالاي باستاعانىن ايتىپ بەردى.
«2011-جىلى ءجۇنىسوۆ «Baur Kazakhstan» ج ش س قۇرۋدى ۇسىندى، قۇجاتتارعا سايكەس، ونىڭ جالعىز يەسى بولدى. نەگىزى اكسيالار بىلاي تاراتىلدى: ماعان 4، ايباتىر جۇماعۇلوۆقا 3، جۇنىسوۆكە تيەسىلىسى 33 پايىز. ءجۇنىسوۆ ءبارىن ءوزى باسقارىپ وتىردى. مەن تەك جان-جاقتى قولداۋ كورسەتىپ، كومەكتەسۋگە تىرىستىم»، - دەدى ول.
الايدا 2018 -جىلدىڭ سوڭىنا قاراي كومپانيا بونكروتقا ۇشىرادى.
«كومپانيانىڭ بونكروتقا ۇشىراعانىن ەستىپ جانە مەنى جاقىن ادامىم، سونداي-اق قۇدالارىم قاسىم مەن التاي جۇنىسوۆتەر الداپ، توناپ كەتكەنىن بىلگەندە، قاتتى اۋىرىپ قالدىم. ينسۋلت الىپ جانساقتاۋ بولىمىنە ءتۇستىم. ال 2021 -جىلى ونىڭ YouTube كانالى ارقىلى كومپانيالارىن تارتىپ الدى دەپ ايىپتاۋى ۇلكەن سوققى بولدى»، - دەدى گۇلميرا ساتىبالدى.
بۇعان دەيىن كاسىپكەر اباي ءجۇنىسوۆ گۇلميرا ساتىبالدى بىرلەسكەن سەرىكتەستىكتە ۇرلىق جاسادى دەگەن كۇدىكپەن كىناسىن مويىنداۋدى تالاپ ەتىپ، 2019 -جىلدىڭ اقپانىنان بەرى ۇيىندە زاڭسىز قاماۋدا ۇستاعانىن ايتقان ەدى.
ايتا كەتەيىك، الدىن الا تىڭداۋ كەزىندە، ايىپتالۋشى گ. ساتىبالدى القابيلەر سوتىنا قاتىسپايتىنىن جەتكىزگەن بولاتىن.
ەستەرىڭىزگە سالا كەتەيىك، بىلتىر گۇلميرا ساتىبالدى بىرەۋدىڭ مۇلكىن يەمدەنۋ جانە جىمقىرۋ قىلمىستىق ءىسى بويىنشا 7 -جىلعا باس بوستاندىعىنان ايىرىلدى.
اۆتور
الما مۇقانوۆا