اقوردادا ەرلان قاريننىڭ توراعالىعىمەن ىشكى ساياسات ماسەلەلەرى جونىندە رەسپۋبليكالىق كەڭەس ءوتتى. جيىنعا پرەزيدەنت اكىمشىلىگى قۇرىلىمدىق بولىمشەلەرىنىڭ باسشىلارى، ۇكىمەت مۇشەلەرى، ءوڭىر اكىمدەرىنىڭ ورىنباسارلارى جانە ىشكى ساياسات باسقارمالارىنىڭ باسشىلارى قاتىستى.
ۆيتسە-پرەزيدەنت يدەولوگيالىق كۇن ءتارتىبىن قالىپتاستىراتىن كونستيتۋتسيالىق قۇندىلىقتارعا كەڭىنەن توقتالدى.
- كونستيتۋتسيامىز مەملەكەتتىڭ قۇقىقتىق نەگىزىن عانا ەمەس، سونىمەن قاتار قوعامداعى ىرگەلى قۇندىلىقتاردى دا ايقىندايدى. وسىلايشا، تاريحىمىزدا تۇڭعىش رەت ەل يدەولوگياسىنىڭ باعىت-باعدارى ناقتىلانىپ، مازمۇندىق تۇرعىدان تولىقتى. سوندىقتان ءبىزدىڭ ەڭ باستى مىندەتىمىز - كونستيتۋتسيالىق قۇندىلىقتاردى ءتۇسىندىرۋ جانە ناسيحاتتاۋ، - دەدى ەرلان قارين.
وسى ورايدا ۆيتسە-پرەزيدەنت پروگرەسسيۆتى كونستيتۋتسيالىق قۇندىلىقتاردى ودان ءارى ىلگەرىلەتىپ، قوعامدىق سانادا ورنىقتىرۋ قاجەت ەكەنىن اتاپ ءوتتى.
- مەملەكەت باسشىسىنىڭ ساياساتى قازاقستاندى ودان ءارى وركەندەتۋگە باعىتتالعان. ەلىمىزدە ەلەۋلى وزگەرىستەر بولىپ جاتىر. قوعامدىق ءومىردىڭ بارلىق سالاسى جاڭعىرىپ جاتىر. سوندىقتان حالىق اراسىندا ەڭبەكقورلىق، ءبىلىم، عىلىم جانە پروگرەسس سەكىلدى جاسامپاز قۇندىلىقتاردى دارىپتەۋ وتە ماڭىزدى. سونىمەن قاتار ەسكىلىكتى، توعىشارلىقتى، راديكاليزمدى ناسيحاتتايتىن كەز كەلگەن ارەكەتكە قاتاڭ توسقاۋىل قويۋ كەرەك. كوپشىلىك ورتادا اراگىدىك ۇشىراساتىن ءتۇرلى شەكتەن تىس ارەكەتتەر مەن مادەنيەتسىزدىككە ادامداردىڭ ءوزى قارسى ەكەنىن كورىپ ءجۇرمىز. بۇل قوعام مادەنيەتى مەن قۇندىلىقتاردىڭ وزگەرە باستاعانىن بىلدىرەدى. دەمەك پرەزيدەنتتىڭ پروگرەسسيۆتى رەفورمالارى جۇرتشىلىق تاراپىنان كەڭىنەن قولداۋ تاپتى ءارى بۇل بۇلجىماس سيپاتقا يە بولدى، - دەدى ەرلان قارين.
ۆيتسە-پرەزيدەنتتىڭ پايىمداۋىنشا، ىشكى ساياساتتىڭ باسىم باعىتتارىنىڭ ءبىرى - مەملەكەت باسشىسىنىڭ تاپسىرمالارى مەن باستامالارىن ساپالى ىسكە اسىرۋ.
- پرەزيدەنت قاسىم-جومارت توقايەۆ ءوز جولداۋىندا مەملەكەتتىك باسقارۋ جۇيەسىن رەفورمالاۋدىڭ كەشەندى جوسپارىن ازىرلەۋدى تاپسىردى. سيفرلاندىرۋ مەن جاساندى ينتەللەكتىنى قولدانۋعا نەگىزدەلگەن جاڭا ەكونوميكاعا ساي مەملەكەتتىك باسقارۋ مودەلىن قالىپتاستىرۋ قاجەت. سوندىقتان مەملەكەتتىڭ سەرۆيستىك مودەلىنىڭ تەتىكتەرىن، اتاپ ايتقاندا، حالىقپەن كەرى بايلانىس ورناتۋعا ارنالعان اقپاراتتىق جۇيەلەردى جەتىلدىرۋ ءىسىن جەدەلدەتكەن ءجون. ورتالىق مەملەكەتتىك ورگاندار مەن وڭىرلەردىڭ بارلىق بايلانىس ورتالىقتارىن ءبىرىڭعاي سيفرلىق پلاتفورماعا بىرىكتىرۋ ماڭىزدى مىندەتكە اينالىپ وتىر، - دەدى ەرلان قارين.
كەڭەس بارىسىندا ەتنوسارالىق جانە كونفەسسياارالىق كەلىسىمدى نىعايتۋ، قوعامدىق بىرلەستىكتەرمەن جانە ساراپشىلارمەن ىقپالداستىق ماسەلەلەرى، سونداي-اق مادەني-گۋمانيتارلىق، اقپاراتتىق، وتباسى جانە جاستار ساياساتىنداعى باسىمدىقتار قارالدى.
جيىن قورىتىندىسى بويىنشا جاۋاپتى مەملەكەتتىك ورگاندارعا ىشكى ساياساتتىڭ نەگىزگى باعىتتارىن جۇزەگە اسىرۋ جونىندە ناقتى تاپسىرمالار بەرىلدى.
ايتا كەتەلىك ەرلان قارين پرەزيدەنت جولداۋىن ىسكە اسىرۋدىڭ ءۇش نەگىزگى مىندەتىن اتاعان ەدى.