- كاسىپكەرلەر مەملەكەتتىك قولداۋ الۋعا ءوتىنىش بىلدىرگەن كەزدە كەزدەسەتىن نەگىزگى پروبلەمالاردى اتاپ وتەيىن. ءبىرىنشى كەزەكتە، بۇل - كرەديتتىك تاريح. نەسيە العىسى كەلەتىن ازاماتتاردىڭ، ەڭ الدىمەن، كرەديتتىك تاريحى جاقسى بولۋى ماڭىزدى. ەكىنشى ماسەلە - كەپىلزاتتىڭ جەتكىلىكسىزدىگى. بۇل پروبلەمانى شەشۋ ءۇشىن ءبىز كەپىلدىك بەرەمىز. اتاپ ايتقاندا، 3,5 ميلليارد تەڭگەگە دەيىنگى سوما بويىنشا قارىزدىڭ 85 پايىزىنا دەيىن كەپىلدىك ۇسىنامىز، - دەدى ول تىلشىلەر ساۋالىنا وراي.
ونىڭ ايتۋىنشا، ءۇشىنشى ماسەلە - كاسىپكەردىڭ ءوز قاراجاتىنىڭ بولماۋى. كوپشىلىگىندە جەكە قاراجاتى جەتكىلىكسىز.
- شاعىن بيزنەسپەن اينالىسقىسى كەلەتىن ازاماتتارعا بۇل ىسكە بەلگىلى ءبىر جيناقپەن كەلۋ كەرەكتىگىن ايتامىز. سوڭعى ماسەلە - جوبالاردىڭ جەتكىلىكتى دەڭگەيدە دايىندالماۋى. كاسىبىن جاڭادان باستاعىسى كەلەتىن نەمەسە جاڭا باعىتتى يگەرۋدى جوسپارلاپ وتىرعان كاسىپكەرلەر الدىن الا دايىندالۋى قاجەت. بۇل ۋنيۆەرسيتەتكە ءتۇسۋ سياقتى. كاسىپ اشۋ ءۇشىن دە دايىندىق كەرەك. دەمەك، ماركەتينگتىك جانە سمەتالىق ەسەپتەرى، شيكىزاتتى قايدان ساتىپ الاتىنى، ءونىمدى كىمگە ساتاتىنى، جوبانىڭ رەنتابەلدىلىگى جانە تاعى باسقا ماسەلەلەر قامتىلعان بيزنەس-جوسپار بولۋى ءتيىس، - دەدى باسقارما باسشىسى.
فارحات سارسەكەيەۆ كاسىبىن جاڭادان باستاۋشىلارعا «ارماننان ىسكە» دەپ اتالاتىن پيلوتتىق باعدارلامانىڭ ىسكە قوسىلعانىن ايتادى.
- ەكى قالادا دەمو-كۇن وتكىزىپ، وتە جاقسى جوبالاردى ىرىكتەپ الدىق. باعدارلامانىڭ ءمانى نەدە؟ جاسى 30 بەن 55 ارالىعىنداعى، جۇمىس تاجىريبەسى، جاقسى كرەديتتىك تاريحى جانە بەلگىلى ءبىر جيناعى بار جاس كاسىپكەرلەردى اكسەلەراتسيادان وتكىزەمىز. ەكى جىل ىشىندە Human Capital كومپانياسىن جالدادىق. ول كاسىپكەرلەردىڭ بيزنەس-جوسپارلارىن قارجىلاندىرۋعا دايىنداۋ ءۇشىن اكسەلەراتسيا جۇرگىزەدى. ەكى ايدىڭ قورىتىندىسى بويىنشا كوميسسيا وتكىزىپ، جوبالاردى ىرىكتەيمىز جانە قارجىلاندىرۋعا جىبەرەمىز. وتكەن اپتادا الماتىدا دەمو-كۇن وتكىزدىك. وعان دەيىن استانادا ۇيىمداستىرعان ەدىك. ال جەلتوقسان ايىنىڭ باسىندا شىمكەنت قالاسىندا وتكىزۋدى جوسپارلاپ وتىرمىز. ازىرگە بۇل - پيلوتتىق باعدارلاما. ەگەر ونىڭ ناتيجەسى جاقسى بولسا، باعدارلامانى كەڭەيتىپ، مەملەكەتتىك قولداۋ دەڭگەيىنە شىعارۋدى جوسپارلاپ وتىرمىز، - دەدى ول.
ايتا كەتەيىك، «بايتەرەك» ۇلتتىق باسقارۋشى حولدينگى بيىل توعىز ايدا ەكونوميكاعا 8,7 تريلليون تەڭگەگە قولداۋ كورسەتتى.