قازاقستاندا ەلەكتروموبيلدەردى قۋاتتاۋ ستانتسيالارىنداعى ولشەۋ دالدىگىنە قويىلاتىن جاڭا تالاپتار ەنگىزىلەدى.
2026-جىلعى 1-جەلتوقساننان باستاپ ەلەكتروموبيلدى قۋاتتاۋ كەزىندە جۇرگىزىلەتىن ولشەۋلەر مەملەكەتتىك رەتتەۋ سالاسىنا جاتادى. وسىعان بايلانىستى قۋاتتاۋ كەزىندە قولدانىلاتىن ولشەم قۇرالدارى مىندەتتى تەكسەرۋدەن وتەدى. ءتيىستى تالاپتار ساۋدا جانە ينتەگراتسيا ءمينيسترىنىڭ 2026-جىلعى 25-قىركۇيەكتەگى № 272-ن ق «مەملەكەتتىك رەتتەۋگە جاتاتىن ولشەمدەر تىزبەسىن بەكىتۋ تۋرالى» بۇيرىعىمەن بەلگىلەنگەن.
جاڭا تالاپتار ەڭ الدىمەن ەلەكتروموبيلدەردى قۋاتتاۋ كەزىندە جۇرگىزىلەتىن تولەمنىڭ دۇرىستىعىن قامتاماسىز ەتۋگە جانە تۇتىنۋشىلاردىڭ قۇقىقتارىن قورعاۋعا باعىتتالعان. بۇگىندە ەلەكتروموبيلدى قۋاتتاۋ قۇنى بەرىلگەن ەلەكتر ەنەرگياسىنىڭ كولەمىنە بايلانىستى ەسەپتەلەدى. سوندىقتان تۇتىنۋشىعا كورسەتىلەتىن قىزمەتتىڭ قۇنىن انىقتاۋ كەزىندە پايدالانىلاتىن جابدىق ەلەكتر ەنەرگياسىنىڭ كولەمىن ءدال ولشەۋى كەرەك.
- جاڭا تالاپتارعا سايكەس، ەلەكتروموبيلگە بەرىلگەن ەلەكتر ەنەرگياسىنىڭ كولەمىن ەسەپكە الاتىن ولشەم قۇرالدارى بەلگىلەنگەن مەترولوگيالىق تالاپتارعا ساي بولۋى جانە ۋاقتىلى تەكسەرۋدەن ءوتۋى قاجەت. قۇرىلعىلاردى تەكسەرۋ ولاردىڭ جارامدىلىعىن، بەلگىلەنگەن دالدىك شەگىندە جۇمىس ىستەيتىنىن جانە ەلەكتروموبيلگە بەرىلگەن ەلەكتر ەنەرگياسىنىڭ ناقتى كولەمىن دۇرىس كورسەتەتىنىن انىقتايدى. بۇل تۇتىنۋشىنىڭ كولىگىن قۋاتتاۋ كەزىندە ناقتى بەرىلگەن ەلەكتر ەنەرگياسىنىڭ كولەمىنە عانا اقى تولەۋىنە كەپىلدىك بەرەدى،- دەلىنگەن حابارلامادا.
ەلەكتر قۋاتىن قۋاتتاۋ ستانتسيالارىنىڭ يەلەرى مەن وپەراتورلارى پايدالانىلاتىن ولشەم قۇرالدارىنىڭ بەلگىلەنگەن تالاپتارعا سايكەستىگىن باقىلاپ، ولاردىڭ ۋاقتىلى تەكسەرۋدەن ءوتۋىن قامتاماسىز ەتۋى ءتيىس. ال ەلەكتروموبيل يەلەرى ءۇشىن بۇل وزگەرىستەر تولەۋ كەزىندە تۋىنداۋى مۇمكىن قاتەلىكتەردەن قوسىمشا قورعانىس بەرىپ، جابدىق كورسەتكىشتەرىنىڭ دۇرىستىعىنا دەگەن سەنىمدى ارتتىرادى.
ەلەكتر كولىگى مەن قۋاتتاۋ ينفراقۇرىلىمى قارقىندى دامىپ جاتقان كەزەڭدە ولشەۋلەرگە قويىلاتىن مىندەتتى تالاپتاردى ەنگىزۋ وزەكتى. قۋاتتاۋ ستانتسيالارىنىڭ سانى ارتقان سايىن نارىقتاعى قىزمەت كورسەتۋ ءتارتىبى دە بىرىزدەنىپ، وپەراتور مەن تۇتىنۋشى اراسىنداعى تولەم دالدىگى مەن اشىقتىعىن قامتاماسىز ەتۋگە باعىتتالعان تالاپتار قالىپتاسىپ جاتىر.
وسىعان دەيىن قازاقستاندا كۇن ەنەرگياسىمەن قۋات الاتىن ەلەكتروموبيل ستانتسيالارىنىڭ جەلىسى كەڭەيەتىنى ايتىلدى.