ەلەكتروموبيلگە ارنايى بەلگى تاعىلماسا قانشا ايىپپۇل سالىنادى

استانا. KAZINFORM - ەلىمىزدە ەلەكتروموبيلدەرگە ارنايى تانۋ بەلگىسىن تاعۋ مىندەتتى. بۇل تۋرالى ق ر ءى ءى م اكىمشىلىك پوليتسيا كوميتەتىنىڭ باسقارما ءتوراعاسى مۇرات يمانبايەۆ ايتتى.

«جول ءجۇرۋ ەرەجەسىندە انىق جازىلعان. ەلەكتروموبيلدەر ارنايى تانۋ بەلگىسىن تاعۋى كەرەك. ادامدار «ش» تانۋ بەلگىسىمەن شاتىستىرىپ جاتادى، ونداي بەلگى ەرىكتى تۇردە تاعىلادى. ال ەلەكتروموبيلدەرگە ارنايى بەلگىنى جابىستىرۋ مىندەتتى سانالادى. ولاي بولماعان جاعدايدا، اكىمشىلىك جازا قاراستىرىلعان»، - دەدى ول و ك ق الاڭىندا وتكەن باسپا ءسوز ءماسليحاتىندا.

اكىمشىلىك پوليتسيا كوميتەتىنىڭ باسشىسى قايسار سۇلتانبايەۆ بۇل تالاپتى بۇزعاندارعا قانشا سومادا ايىپپۇل سالىناتىنىن اتاپ ءوتتى.

«كولىك قۇرالدارىن پايدالانۋعا رۇقسات بەرۋ جونىندەگى نەگىزگى ەرەجەلەردىڭ» 9-تارماعىنا ساي، ەلەكتروموبيلدەرگە قابىرعاسى ءبىر ءجۇز ەلۋ ميلليمەتر جاسىل ءتۇستى شارشى تۇرىندە جانە قارا ءتۇستى 7.22 جول بەلگىسىنىڭ ءرامىزى بەينەلەنگەن «ەلەكتروموبيل» تانۋ بەلگىسى كولىكتىڭ ارتقى جاعىنا جابىستىرىلادى. بۇنداي تانۋ بەلگىسىن تاقپاعان جۇرگىزۋشىلەرگە اكىمشىلىك قۇقىق بۇزۋشىلىق تۋرالى كودەكستىڭ 620-بابىنا ساي ءبىرىنشى رەت ۇستالعاندا ەسكەرتۋ بەرىپ، قايتالانعان جاعدايدا 3 ا ە ك كولەمىندە ايىپپۇل سالۋ قاراستىرىلعان»، - دەدى كوميتەت باسشىسى.

قايسار سۇلتانبايەۆ «ەلەكتروموبيل» تانۋ بەلگىسىن تاعۋ تالابى اۋەلدە ەلەكترمەن جۇرەتىن كولىك جۇرگىزۋشىلەرىنىڭ وزدەرىنە ىڭعايلى بولۋى ءۇشىن ەنگىزىلگەنىن اتاپ ءوتتى. سەبەبى ەلەكتر ماشيناسىن قۋاتتاندىرۋعا بولاتىن ارنايى ورىندار بولادى، وندا باسقا كولىكتەر تۇرماۋى ءتيىس. ينسپەكتورلار الگى تانۋ بەلگىسىن كورسە، ءوز جونىمەن جۇرە بەرەدى. ونداي تانۋ بەلگىسى جوق كولىكتىڭ تۇرعانىن كورسە، ول جەردەن كولىكتى الدىرۋعا ارەكەت جاسايدى.

«سوندىقتان ەلەكتر قۋاتىمەن جۇرەتىن كولىك يەلەرى ءبىرىنشى كەزەكتە مۇنداي بەلگىنىڭ بولۋىنا وزدەرى مۇددەلى بولۋى كەرەك»، - دەپ ءتۇيدى ءسوزىن اكىمشىلىك پوليتسيا كوميتەتىنىڭ ءتوراعاسى.

ايتا كەتەيىك، ەلىمىزدە «جاسىرىن پاترۋل» جۇيەسى ەنگىزىلىپ جاتىر.

سونداي- اق بۇدان بىلاي ادام تاسىمالىمەن تەك جەكە تاسىمالداۋشى رەتىندە تىركەلگەن تۇلعالار عانا اينالىسا الاتىن بولادى.

ودان بولەك، قىسقى ماۋسىمدا جازعى دوڭعالاقپەن جۇرگەن جۇرگىزۋشىگە قانشا ايىپپۇل سالىناتىنىن جازعان ەدىك.

اۆتور

ەربول جانات