ەلەكتر ساموكاتتاردىڭ جىلدامدىعىنا قاتىستى ءتارتىپ قايتا قارالۋى مۇمكىن

استانا. KAZINFORM - ساموكاتتاردىڭ ءجۇرۋ جىلدامدىعى ماسەلەسىن قايتا قاراۋ كەرەك. بۇل تۋرالى پارلامەنت ءماجىلىسى جانىنداعى قوعامدىق پالاتا وتىرىسىندا ق ر ىشكى ىستەر ءمينيسترىنىڭ ورىنباسارى يگور لەپەحا ءمالىم ەتتى.

- بۇعان دەيىن دەپۋتاتتار اكىمدەرگە ەرەجەنى ازىرلەۋگە وكىلەتتىك بەرۋدى ۇسىنعان ەدى. مىسالى، جەكسەنبى كۇنى ساياباقتا ساموكتپەن جۇرۋگە تىيىم سالا الاتىنداي قۇزىرەت بەرۋ ۇسىنىسى تالقىلانعان ەدى. سونداي-اق قانداي دا ءبىر ۋاقىت ارالىعىندا كولىك كوپ جۇرەتىن داڭعىل جولدا ولاردىڭ قوزعالىسىن شەكتەۋ تۋرالى ۇسىنىس بولدى. نەگە ەكەنىن تۇسىنبەيمىن، ءبىراق دەپۋتاتتار بۇل نورمانى قولدامادى. بۇل نورمالار دا ۇلكەن جاۋاپكەرشىلىك بولار ەدى، - دەدى ي. لەپەحا «قۇقىق بۇزۋشىلىقتىڭ پروفيلاكتيكاسى تۋرالى» زاڭ جوباسىن تالقىلاۋ كەزىندە.

بۇدان بولەك ول ساموكاتتارعا تروتۋاردا جۇرۋىنە تىيىم سالۋ تۋرالى ۇسىنىسى بولعانىن ەسكە سالدى.

- ال وسىنى پارلامەنتتە تالقىلاۋ كەزىندە، ساموكاتتارلىڭ تروتۋاردا جۇرۋىنە رۇقسات بەرۋ تۋرالى ءۋاج ايتىلدى. وسى ورايدا ولار اگرەگاتورلار ارقىلى رەتتەلەتىنىن، ساموكاتتار ساعاتىنا 6 ك م جىلدامدىقتى اسىرمايتىنىن دالەلدەگەن ەدى. بۇل رەتتە، اگرەگاتورلار دا ولاردىڭ جىلدامدىعىن باسەڭدەتۋگە بولاتىنىن، ياعني جۋاپكەرشىلىكتى وزدەرىنە الاتىنىن ايتىپ ۋادە بەردى. ءىس جۇزىندە ەشكىم جىلدامدىقتى باياۋلاتپادى. نەلىكتەن بىزدە اگرەگاتورلاردا جاۋاپكەرشىلىك جوق؟ سوندىقتان بۇل ماسەلەنى قايتا قاراۋ كەرەك، - دەدى ءمينيستردىڭ ورىنباسارى.

ەسكە سالساق، 2023-جىلى تامىز ايىندا جول ەرەجەسىن بۇزعان ساموكاتشىلارعا ايىپپۇل سالۋ كۇشىنە ەندى.

اتاپ ايتقاندا، زاڭمەن ەنگىزىلگەن شارتتار مەن تىيىمداردى ساقتاي وتىرىپ، جولدىڭ ءجۇرىس بولىگىنىڭ وڭ جاق شەتى بويىنشا ەلەكتر ساموكاتتاردىڭ جۇرۋىنە رۇقسات ەتىلەدى.

بۇل تۇرعىدا جۇرگىزۋشىنىڭ 18 جاسقا تولۋى، كەز كەلگەن ساناتتاعى كولىك قۇرالىن باسقارۋ قۇقىعىنا جۇرگىزۋشى كۋالىگى مەن شلەمنىڭ بولۋى، ال تاۋلىكتىڭ قاراڭعى ۋاقىتىندا قوزعالۋ كەزىندە باسقا كولىك قۇرالدارىنىڭ جۇرگىزۋشىلەرىنە كورىنۋى ءۇشىن ءتيىستى جارىق تۇسىرەتىن بەلگىلەردى تاعۋ ەسكەرىلگەن. ەلەكتر ساموكاتىنا تروتۋار نەمەسە جاياۋ جۇرگىنشىلەر جولىمەن ساعاتىنا 6 ك م- دەن اسپايتىن جىلدامدىقپەن جۇرۋىنە رۇقسات ەتىلدى. شاعىن ەلەكتر كولىك قۇرالدارى مەن ەلەكتر ساموكاتتارى جۇرگىزۋشىلەرىنىڭ قۇقىقتارى مەن مىندەتتەرى بەلگىلەندى. سونىمەن قاتار، موپەد، ۆەلوسيپەد، شاعىن ەلەكتر كولىك قۇرالدارى مەن ەلەكتر ساموكاتتارى جۇرگىزۋشىلەرىنە قاتىستى شەكتەۋلەر ناقتىلاندى.