جوبانىڭ نەگىزگى ماقساتى - مەملەكەتتىك قولداۋدى وتباسىلاردىڭ ناقتى ماتەريالدىق جاعدايىن ەسكەرە وتىرىپ كورسەتۋ جانە بيۋجەت قاراجاتىن، ەڭ الدىمەن، مەملەكەت كومەگىنە شىن مانىندە مۇقتاج ازاماتتارعا باعىتتاۋ.
بۇگىندە مەملەكەتتىك الەۋمەتتىك قورعاۋ جۇيەسى حالىقتىڭ ءتۇرلى ساناتىن قامتىپ، الەۋمەتتىك تولەمدەر مەن قولداۋ شارالارىنىڭ كەڭ اۋقىمىن ۇسىنادى. سونىمەن قاتار جەكەلەگەن الەۋمەتتىك كومەك تۇرلەرىن تاعايىنداۋدىڭ قولدانىستاعى تەتىكتەرى الۋشىلاردىڭ ناقتى ماتەريالدىق جاعدايىن ءاردايىم تولىق ەسكەرە بەرمەيدى.
سوندىقتان تابىسى جوعارى ءارى اۋقاتتى وتباسىلار دا ومىرلىك قيىن جاعدايعا تاپ بولعان ازاماتتارمەن بىردەي مەملەكەتتىك قولداۋ الۋى مۇمكىن.
- مينيسترلىك الەۋمەتتىك قولداۋ كورسەتۋ تاسىلدەرىن جەتىلدىرۋ، ونىڭ اتاۋلىلىعى، الەۋمەتتىك ادىلدىگى جانە بيۋجەت قاراجاتىن پايدالانۋ تيىمدىلىگىن ارتتىرۋ باعىتىندا جۇمىستاردى جۇرگىزىپ جاتىر. پيلوتتىق جوبا اياسىنداعى جاڭا تاسىلدەر وتباسىنىڭ ماتەريالدىق جاعدايىن باعالاۋ ناتيجەسىندە ءال-اۋقاتى جوعارى جانە اۋقاتتى ساناتتارعا جاتقىزىلعان وتباسىلار الاتىن 36 الەۋمەتتىك تولەمنىڭ 12 تۇرى بويىنشا قولدانىلادى. ۇسىنىلىپ وتىرعان وزگەرىستەر مەملەكەتتىڭ الەۋمەتتىك مىندەتتەمەلەرىنەن باس تارتۋدى بىلدىرمەيتىنىن، كەرىسىنشە، مەملەكەتتىك قولداۋدى ءبولۋ تەتىكتەرىن جەتىلدىرۋگە باعىتتالعانىن اتاپ وتكەن ءجون، - دەلىنگەن مينيسترلىك حابارلاماسىندا.
وزگەرىستەردىڭ باستى قاعيداتى - الەۋمەتتىك كومەكتىڭ جەكەلەگەن تۇرلەرىنىڭ كولەمى مەن سيپاتىن ازاماتتاردىڭ ناقتى قاجەتتىلىكتەرى مەن وتباسىلارىنىڭ ماتەريالدىق مۇمكىندىكتەرىن ەسكەرە وتىرىپ ايقىنداۋ.
مۇنداي ءتاسىل الەۋمەتتىك ساياساتتىڭ تيىمدىلىگىن ارتتىرۋعا، بيۋجەت قاراجاتىن نەعۇرلىم ءادىل بولۋگە جانە مەملەكەت قولداۋىنا اسا مۇقتاج ازاماتتارعا كورسەتىلەتىن كومەكتى كۇشەيتۋگە مۇمكىندىك بەرەدى.
پيلوتتىق جوبانى ىسكە اسىرۋ بارىسىندا ازاماتتاردىڭ قۇقىقتارىن قورعاۋعا، وتباسىلاردىڭ ماتەريالدىق جاعدايىن وبەكتيۆتى باعالاۋعا جانە مەملەكەتتىك قولداۋ شارالارىنا قول جەتكىزۋدى نەگىزسىز شەكتەۋگە جول بەرمەۋگە ەرەكشە ءمان بەرىلەدى.
وسى ماقساتتا الەۋمەتتىك تولەمدەردى تاعايىنداۋدىڭ قولدانىستاعى تەتىكتەرىنە جان-جاقتى تالداۋ جۇرگىزۋ، ۇسىنىلىپ وتىرعان وزگەرىستەردىڭ ىقتيمال الەۋمەتتىك سالدارىن باعالاۋ جانە ازاماتتاردىڭ مۇددەلەرىن ەسكەرە وتىرىپ، ءتيىستى شەشىمدەر ازىرلەۋ كوزدەلگەن.
اتالعان جۇمىستى ۇيلەستىرۋ ءۇشىن ەڭبەك مينيسترلىگىنىڭ بازاسىندا ارنايى جوبالىق وفيس جۇمىس ىستەيدى.
جوبالىق وفيستىڭ قۇرامىنا پرەزيدەنت اكىمشىلىگى، ۇكىمەت اپپاراتى، قۇرىلتاي وكىلدەرى جانە ساراپشىلار قاۋىمداستىعىنىڭ مۇشەلەرى كىرەدى.
ۇسىنىلىپ وتىرعان تاسىلدەردى جان-جاقتى قاراۋ، ولاردىڭ الەۋمەتتىك-ەكونوميكالىق سالدارىن تالداۋ، ىقتيمال تاۋەكەلدەردى باعالاۋ جانە الەۋمەتتىك قولداۋ جۇيەسىن ودان ءارى جەتىلدىرۋ بويىنشا ورتاق ۇستانىمعا نەگىزدەلگەن ۇسىنىستاردى ازىرلەۋ باستى نازارعا الىنادى.
سونداي-اق تۋىندايتىن ماسەلەلەردى وبەكتيۆتى ءارى كەشەندى قاراستىرۋ ماقساتىندا جۇمىسقا سالا ماماندارى مەن تاۋەلسىز ساراپشىلاردى تارتۋ جوسپارلانىپ وتىر.
جوبانى ىسكە اسىرۋ كەزەڭ-كەزەڭىمەن جۇرگىزىلەدى. بۇل رەتتە تالداۋ ناتيجەلەرى، ۇسىنىلعان تەتىكتەردىڭ تيىمدىلىگى جانە زاڭنامادا بەلگىلەنگەن الەۋمەتتىك كەپىلدىكتەردىڭ ساقتالۋى ەسكەرىلەدى.
پيلوتتىق جوبانىڭ قورىتىندىسى بويىنشا الەۋمەتتىك قولداۋ كورسەتۋ تەتىكتەرىن ودان ءارى جەتىلدىرۋگە قاتىستى ۇسىنىستار ازىرلەنەدى.
ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىك الەۋمەتتىك ساياساتتىڭ باستى ماقساتى - ازاماتتاردىڭ ءال-اۋقاتىن ارتتىرۋ، الەۋمەتتىك وسال توپتاردى قورعاۋ جانە الەۋمەتتىك قولداۋدىڭ ءادىل، اشىق ءارى اتاۋلى جۇيەسىن قالىپتاستىرۋ ەكەنىن اتاپ ءوتتى.
- مەملەكەتتىك كومەك، ەڭ الدىمەن، وعان شىن مانىندە مۇقتاج ازاماتتارعا كورسەتىلىپ، بيۋجەت قاراجاتى قوعام يگىلىگى ءۇشىن بارىنشا ءتيىمدى پايدالانىلۋى ءتيىس، - دەدى مينيسترلىكتەن.
قازاقستاندا 729 ادام الەۋمەتتىك تولەمدەردەن ءوز ەركىمەن باس تارتقانىن جازعان ەدىك.