مەملەكەتتىك ناگرادانى قازاقستان پرەزيدەنتى قاسىم-جومارت توقايەۆتىڭ اتىنان تۋريزم جانە سپورت ءمينيسترى ەربول مىرزابوسىنوۆ تابىستادى، دەپ حابارلايدى ميننيسترلىكتىڭ باسپا ءسوز قىزمەتى.
ماراپات دەۆيد حاگگەرتيگە حالىقارالىق سپورتتىق ىنتىماقتاستىقتى دامىتۋعا، ەلدەر اراسىنداعى دوستىق بايلانىستاردى نىعايتۋعا جانە الەمدىك تەننيستىڭ وركەندەۋىنە قوسقان كوپجىلدىق ۇلەسى ءۇشىن بەرىلدى.
سالتاناتتى راسىمدە الماتى قالاسىنىڭ اكىمى دارحان ساتىبالدى مەملەكەت باسشىسىنىڭ باس اسسامبلەيا قاتىسۋشىلارىنا جولداعان قۇتتىقتاۋىن وقىپ بەردى.
- وسى بەدەلدى حالىقارالىق فورۋمنىڭ الماتىدا ءوتۋى الەمدىك قاۋىمداستىقتىڭ ەلىمىزگە دەگەن زور سەنىمى مەن قۇرمەتىن كورسەتەدى. ءبىز ءۇشىن مۇنداي مويىنداۋ - ۇلكەن مارتەبە. بۇگىنگى جىل سايىنعى باس اسسامبلەيا سەرىكتەستىگىمىزدى ودان ءارى نىعايتۋعا جانە وسى سپورت ءتۇرىن بۇكىل الەمدە دامىتۋعا ىقپال ەتەتىنىنە سەنىمدىمىن، - دەلىنگەن پرەزيدەنتتىڭ ۇندەۋىندە.
دەۆيد حاگگەرتي 2015-جىلدان بەرى حالىقارالىق تەننيس ۇيىمىن باسقارىپ كەلەدى. بۇعان دەيىن ا ق ش تەننيس قاۋىمداستىعىنىڭ (USTA) پرەزيدەنتى قىزمەتىن اتقارعان. 2020-جىلدان باستاپ حالىقارالىق وليمپيادا كوميتەتىنىڭ مۇشەسى.
ماراپاتتاۋ راسىمىندە قازاقستان تەننيس فەدەراتسياسىنىڭ پرەزيدەنتى، World Tennis ۆيتسە-پرەزيدەنتى بولات وتەمۇراتوۆ دەۆيد حاگگەرتيگە قازاق حالقىنىڭ قۇرمەتى مەن قوناقجايلىعىنىڭ بەلگىسى رەتىندە شاپان جاپتى.
ايتا كەتەيىك، 10-13-قازان كۇندەرى الماتىدا ءوتىپ جاتقان World Tennis باس اسسامبلەياسىنا 137 ەلدەن 262 دەن استام دەلەگات قاتىسۋدا. جيىندا الەمدىك تەننيستى دامىتۋ، بالالار مەن جاس وسپىرىمدەر سپورتىن قولداۋ، ينفراقۇرىلىمدى جەتىلدىرۋ، حالىقارالىق جارىستاردى ۇيىمداستىرۋ جانە ۇلتتىق فەدەراتسيالار اراسىنداعى ىنتىماقتاستىقتى نىعايتۋ ماسەلەلەرى تالقىلانۋدا.
اۋقىمدى حالىقارالىق فورۋمنىڭ قازاقستاندا ءوتۋى ەلىمىزدىڭ الەمدىك سپورت قاۋىمداستىعىنداعى بەدەلىن ارتتىرىپ، حالىقارالىق سەرىكتەستىكتى كەڭەيتۋگە جاڭا مۇمكىندىكتەر اشادى.
وسىعان دەيىن حالىقارالىق تەننيس فەدەراتسياسىنىڭ اتاۋى وزگەرگەنى تۋرالى جازدىق.