سونداي-اق كەڭەس مۇشەلەرى 43 ادامنىڭ ازاماتتىقتان باس تارتۋ تۋرالى ءوتىنىشىن قاناعاتتاندىرۋدى ۇسىنباق. ۆيتسە-پرەزيدەنتتىڭ ايتۋىنشا، سوڭعى جىلدارى قازاقستان ازاماتتىعىنان شىعۋعا نيەت بىلدىرۋشىلەر سانىنىڭ ازايۋ ءۇردىسى ساقتالىپ وتىر. اتاپ ايتقاندا، كەيىنگى 8 جىلدا قازاقستان ازاماتتىعىنان شىعۋ تۋرالى وتىنىشتەر سانى شامامەن 40 ەسەگە جۋىق ازايعان.
بۇدان بولەك ەرلان قارين قازاق ءتولقۇجاتىنىڭ بەدەلى ارتىپ كەلە جاتقاندىعىن ايرىقشا ايتتى. ءتۇرلى يندەكستەردىڭ دەرەكتەرىنە سايكەس، قازاقستان ءتولقۇجاتى وڭىردە ەڭ تاڭداۋلى سانالادى. ازاماتتارىمىز الەمنىڭ 80-گە جۋىق ەلىنە ۆيزاسىز قاتىناي الادى، دەدى ەرلان قارين. سونىمەن قاتار قازاقستان ازاماتتىعى شەتەلدىڭ IT، بيزنەس سالالارىنىڭ كورنەكتى وكىلدەرى، ينۆەستورلار، عالىمدار مەن مادەنيەت قايراتكەرلەرى ءۇشىن تارتىمدى بولا تۇسۋدە.
24.kz