مەملەكەت باسشىسىنىڭ قۇتتىقتاۋىن مادەنيەت جانە اقپارات ءمينيسترى ارمان قىرىقبايەۆ استانادا وتكەن كەزدەسۋدە تابىستادى. پرەزيدەنت قۇتتىقتاۋىندا ونەر يەسىنىڭ ەلىمىزدىڭ مادەنيەتى مەن ونەرىن دامىتۋعا، مۋزىكالىق مۇراسىن دارىپتەۋگە قوسقان ۇلەسىن اتاپ ءوتتى.
- وزىڭىزگە ءتان قوڭىر داۋىسىڭىز بەن ەرەكشە ورىنداۋشىلىق مانەرىڭىز تالعامپاز تىڭدارماننىڭ جۇرەگىنەن ورىن الدى. ءسىز ءداستۇر ساباقتاستىعىن ساقتاپ، حالىق اندەرى مەن بەلگىلى كومپوزيتورلاردىڭ تاڭداۋلى تۋىندىلارىن ناسيحاتتاۋعا مول ۇلەس قوسىپ كەلەسىز. ىزدەنىسكە تولى شىعارماشىلىق جولىڭىز جەمىستى بولىپ، تالانتتى شاكىرتتەر تاربيەلەدىڭىز، - دەلىنگەن قۇتتىقتاۋدا.
مەملەكەت باسشىسى نۇرلان ونەربايەۆقا مىقتى دەنساۋلىق، وتباسىنا باق- بەرەكە جانە ەلىمىزدىڭ رۋحاني-مادەني مۇراسىن بايىتۋ جولىنداعى ەڭبەگىنە تولاعاي تابىس تىلەدى.
بۇدان بۇرىن التىنبەك قورازبايەۆقا «وتان» وردەنى، تالعات مۇسابايەۆقا حالىق ءارتىسى اتاعى بەرىلەتىنىن جازعانبىز.