ۇلكەن كۇدىگىم بار - دەپۋتات قۇمار ويىندارى تۋرالى زاڭ جوباسىنىڭ كەشىگىپ جاتقانىنا نارازى

استانا. KAZINFORM - ءماجىلىس دەپۋتاتى ەلنۇر بەيسەنبايەۆ ۇكىمەتتىڭ لۋدومانيا تۋرالى زاڭ جوباسىن 1,5 جىل بويى ۇستاپ وتىرعانىن ايتىپ، سىبايلاس جەمقورلىققا قارسى ءىس- قيمىل اگەنتتىگىنىڭ وسى ىسكە ارالاسۋىن سۇرادى.

«كەيبىر رەسمي دە بەيرەسمي دە مالىمەت بويىنشا، قۇمار ويىندارىنىڭ نارىعىندا 1 تريلليون تەڭگەدەن استام اقشا اينالىپ ءجۇر. اتالعان زاڭ جوباسى (لۋدومانيا تۋرالى — رەد) ءالى ۇكىمەتتە جاتىر. ءماجىلىس ونى سىزدەرگە قورىتىندى جاساۋعا ۇسىنعانبىز. ءبىز ءبارى زاڭ نەگىزىندە جۇمىس ىستەگەنىن قالايمىز. ءبىراق ۇكىمەتتىڭ وسى زاڭ جوباسىن ۇستاپ وتىرعانىنا 1,5 جىل بولدى. وسى جەردە مەنىڭ ۇكىمەت تاراپىنا ناقتى كۇدىگىم بار. بالكىم قاتەلەسەتىن شىعارمىن، ءبىراق سىبايلاس جەمقورلىققا قارسى قىزمەتكە ۇسىنىسىم بار. ۇكىمەت نەگە ول زاڭ جوباسىن ۇستاپ وتىر؟ 1,5 جىل بولدى. ول جەردە جەمقورلىق تاۋەكەلى بار دەگەن كۇدىك تۋىندايدى. ادامداردىڭ قانداي دا ءبىر مۇددەسى بولۋى مۇمكىن. بۇكىل بۋكمەكەرلىك كەڭسەلەر، لوتەرەيا بيزنەسىمەن اينالىساتىن كوپ ادام كولەڭكەلى كەزدەسۋلەردە ول زاڭ جوباسىن سىزدەرگە وتكىزدىرمەيمىز دەپ ايتاتىن كورىنەدى. بار كۇشىمىزبەن جىبەرمەي قالامىز دەيدى. قانداي كۇشپەن دەيسىزدەر؟ ولاردىڭ ۇلكەن اقشا ۇسىنعىسى كەلەتىنى ايقىن»، - دەدى دەپۋتات.

سونداي- اق، ول اتالعان ماسەلەنى جاڭادان تاعايىندالعان پرەمەر- ءمينيستردىڭ الدىنا قوياتىنىن ايتتى.

«وسى جۇمىس جونىندە ۇلكەن كۇدىگىم بار. جەمقورلىق قايدا جاسىرىنىپ جاتىر دەيمىز؟ مىنە، وسىنداي ۇلكەن، قوعامعا وتە قاجەت زاڭ جوباسىن كىدىرتىپ وتىر. ءيا، ءبىز قۇمار ويىندارىن ويناۋعا حاقىلى ادامداردىڭ جاسىن 25 كە دەيىن ەتىپ شەكتەگىمىز كەلەدى. ماسەلە نەدە؟ پرەزيدەنت تاپسىرما بەرەدى، Amanat فراكسياسىندا تالقىلايمىز. ال زاڭ جوباسى توقتاپ تۇر. ورتاق پايىمعا كەلە الماي وتىرسىزدار. كەلە الماي وتىرساڭىزدار جاقسى عوي. مەن 100 پايىز ول جەردە ۇلكەن كولەڭكەلى مۇددە بار دەپ ەسەپتەيمىن. جاڭا پرەمەر- ءمينيستردىڭ الدىندا وسى تاپسىرمانى مىندەتتى تۇردە قويامىز. الدىمىزدا ۇكىمەت وكىلدەرى وتىر. ءوتىنىش، وسى جۇمىستى قولعا الىڭىزدار»، - دەدى ەلنۇر بەيسەنبايەۆ.

اۆتور

ەسىمجان ناقتىباي