«ۇلكەن جەتىلىك» كوشباسشىلارى سامميتكە قاتىسۋ ءۇشىن كاناداعا باردى

استانا. KAZINFORM - ۇلى بريتانيا، كانادا، فرانسيا، گەرمانيا، يتاليا، جاپونيا جانە ا ق ش ەلدەرىنىڭ جىل سايىنعى كەزدەسۋى جەكسەنبى كۇنى البەرتا پروۆينتسياسىنداعى كانادالىق سكاليست تاۋلارىنداعى كاناناسكيس قالاسىندا باستالدى جانە سەيسەنبىگە دەيىن جالعاسادى، دەپ حابارلايدى The New York Times.

سامميتتىڭ كۇن تارتىبىنە ورمان ورتتەرى، الەمدىك ەكونوميكا جانە ۋكراينا ماسەلەسى ەنگىزىلگەن. الايدا، كوپتەگەن كوشباسشىنىڭ باستى ماقساتى – ا ق ش پرەزيدەنتى دونالد ترامپپەن كەزدەسۋ.

G7 سامميتىنە مۇشە ەمەس ەلدەردىڭ دە ءبىرقاتار كوشباسشىسى شاقىرىلعان. ولاردىڭ قاتارىندا ءۇندىستان، برازيليا، وڭتۇستىك افريكا، مەكسيكا، ۋكراينا، اۋستراليا جانە وڭتۇستىك كورەيا، سونداي-اق ناتو باس حاتشىسى بار.

دۇيسەنبى كۇنى G7 كوشباسشىلارى كۇردەلى تاقىرىپتاردىڭ ءبىرى سانالاتىن جاھاندىق ەكونوميكاعا جانە ورمان ءورتى ماسەلەسىنە نازار اۋدارادى. ماڭىزدى تالقىلاناتىن ماسەلەلەردىڭ ءبىرى – ا ق ش، كانادا جانە مەكسيكا اراسىنداعى ەركىن ساۋدا جونىندەگى كەلىسىم.

سەيسەنبىدە ۋكراينا ماسەلەسى تالقىلانادى. وعان ۋكراينا پرەزيدەنتى ۆلاديمير زەلەنسكي مەن ناتو باس حاتشىسى مارك ريۋتتە قاتىسادى.

باسقا ماڭىزدى ماسەلەلەر بويىنشا كەلىسسوزدەر ىقتيمال تۇردە شاعىن توپتا نەمەسە ەكىجاقتى فورماتتا وتەدى.

كانادالىق رەسمي وكىلدەردىڭ ايتۋىنشا، تاراپتار بۇل جولى ءداستۇرلى بىرلەسكەن كومميۋنيكە -سامميت قورىتىندىسى بويىنشا ورتاق مالىمدەمە جاريالاۋدان ءۇمىت ۇزگەن.

نەگىزگى نازار G7 كوشباسشىلارىنىڭ تاياۋ شىعىستاعى نەمەسە ۋكرايناداعى سوعىسقا قاتىستى ۇيلەستىرىلگەن مالىمدەمە جاساي الۋ-الماۋىنا جانە ا ق ش-تىڭ كۇن تارتىبىندەگى ماڭىزدى ماسەلەلەر بويىنشا ءداستۇرلى وداقتاستارىنان قانشالىقتى الىستاپ كەتكەنىنە باعىتتالىپ وتىر.

بۇل كەزدەسۋ تاياۋ شىعىستاعى جاعدايدىڭ ۋشىعۋى اياسىندا ءوتىپ جاتىر.

اۆتور

نازىم بولەسوۆا