ۇلكەن اۋىلى تۇرعىندارى رەفەرەندۋمعا بەلسەندى قاتىسىپ جاتىر

قوناەۆ. KAZINFORM - بۇگىن ۇلكەن اۋىلدىق وكرۋگىندەگى № 332 رەفەرەندۋم ۋچاسكەسى جۇمىسىن باستادى. تاڭەرتەڭنەن باستاپ اۋىلدىڭ 150 دەن استام تۇرعىن ءوز تاڭداۋىن جاسادى.

«بۇگىنگى رەفەرەندۋمنىڭ ماڭىزى زور. بۇل - حالىقتىڭ ەلدىڭ بولاشاعىنا قاتىستى شەشىمدەردى ءوز قولىنا الاتىن ءساتى. ءاربىر داۋىس بەرۋشىنىڭ تاڭداۋى ماڭىزدى. ءوز تاڭداۋىمىزبەن ءبىز مەملەكەتىمىزدىڭ دامۋىنا ۇلەس قوسامىز. مەنى بۇگىنگى رەفەرەندۋمعا ازاماتتىق بورىشىم جەتەلەدى. ءبىز ءوز بولاشاعىمىزعا نەمقۇرايلى قاراماۋىمىز كەرەك»، - دەدى اۋىل تۇرعىنى راحيما قايىربەكوۆا.

جالپى، الماتى وبلىسى بويىنشا 643 داۋىس بەرۋ ۋچاسكەسى بار.

جامبىل اۋدانىندا 77 ۋچاسكە جۇمىس ىستەپ تۇر.

سونداي-اق وبلىستىق كوميسسيانىڭ رەسمي ينتەرنەت- رەسۋرسىندا «رەفەرەندۋم-2024» اتتى بولىمشە قۇرىلدى. بۇل بولىمدە ۇنەمى ينفوگرافيكا، بەينە جانە اۋديوماتەريالدار سياقتى مەديا-كونتەنت جاريالانىپ وتىرادى.

ەسكە سالايىق، بۇگىن قازاقستاندىقتار اتوم ەلەكتر ستانتسياسىن سالۋ ماسەلەسى بويىنشا جالپى ۇلتتىق رەفەرەندۋمدا داۋىس بەرەدى.

رەسپۋبليكالىق رەفەرەندۋم بيۋللەتەنىندە ءبىر عانا ساۋال بولادى:

- ءسىز قازاقستاندا اتوم ەلەكتر ستانتسياسىن سالۋعا كەلىسەسىز بە؟

داۋىس بەرۋشى جاۋاپتىڭ ەكى نۇسقاسىنىڭ ءبىرىن تاڭدايدى:

- «ءيا، كەلىسەمىن» نەمەسە، «جوق، كەلىسپەيمىن».

وزدەرىنىڭ كونستيتۋتسيالىق قۇقىعىن كورەيا رەسپۋبليكاسىنداعى قازاقستان ازاماتتارى العاشقىلاردىڭ ءبىرى بولىپ جۇزەگە اسىردى.