ەلدەگى ەڭ قارت كولىك جۇرگىزۋشى اتىراۋ وبلىسىندا تۇرادى

استانا. قازاقپارات - ەسبول اۋىلىنىڭ تۇرعىنى سابىر سۇيىنعاليەۆتىڭ جاسى بيىل 90-نان استى. قاريا جاس ءوسپىرىم كەزىندە كولىك باسقارۋدى ۇيرەنىپ، سودان بەرى تەمىر تۇلپار تىزگىندەپ كەلەدى.

سابىر قاريانى ءبىز جەكەمەنشىك ۋاز اۆتوكولىگىن جوندەپ جاتقان جۇمىس ۇستىندە كەزدەستىردىك. تابيعاتىنان ەڭبەككە جارالعان جان 74 جىل بويى جانىنا سەرىك بولعان تەمىر تۇلپارلارىن بابىندا ۇستاۋدى داعدىعا اينالدىرعان.

سابىر سۇيىنعاليەۆ، ارداگەر جۇرگىزۋشى:

- 16 جاسىمنان باستاپ ماشينا ايدادىم. ال، زاڭدى ۇكىمەتتىڭ ماشيناسىنا 1954 -جىلدان باستاپ ورگانيزاتسياعا كەلدىم. سونان ايداپ كەلەمىن. مىنا ۋاز- عا 23 جىل بولدى ءوزىم ايداپ، ءوزىم وڭدايمىن. ەشكىمنەن ەشتەڭە سۇرامايمىن. سەبەبى «سەلحوزتەحنيكادا» قىزمەت ىستەدىم، سوندا موتور باقىلاۋ مەحانيگى بولعام.

تەمىردىڭ ءتىلىن تامىرشىداي تاپ باساتىن مايتالمان مامان ءالى كۇنگە دەيىن اۆتوكولىكتىڭ قاي ءتۇرىن دە تىزگىندەي الادى. قازىر دە جەكەمەنشىك ۋاز شاعىن اۆتوبۋسىمەن اۋىلداستارىنا قولقابىس ەتۋدەن باس تارتقان ەمەس. سەبەبى، ەڭبەكتەن قالسام، اۋىرىپ قالامىن، - دەپ ازىلدەيدى ارداگەر اقساقال.

سابىر سۇيىنعاليەۆ، ارداگەر جۇرگىزۋشى:

- بۇل ماشينامەن ءوز شارۋاما شىعامىن. سوسىن قاراپ تۇرا المايمىن اۋىل ەگىن سالادى. سوعان بىرەۋدەن سۇراسا، ءتىپتى ەڭبەك اقى دا المايمىن. بارىپ كەلەيىك، سالىپ كەلەيىك، ءبىر نارسە الىپ كەلەيىك دەيدى، بارام. ماعان تەك بەنزين قۇيسا بولدى. اۋىل وزىمدىكى عوي..

ەسبول اۋىلىنىڭ تۇرعىندارى جاسى ۇلعايسا دا، ەڭبەكتەن قول ۇزبەي كەيىنگىگە ۇلگى بولا بىلگەن سابىر قاريانى ماقتانىش تۇتادى.

كوكتەمگى- كۇزگى ماۋسىمدا ەگىس القابىن شارلاعان سابىر قاريا قازىر مالشى قىستاقتارىنا جولاۋشى تاسيدى ەكەن. مىنە بۇگىن دە كولىگى وزىنە ساي ارداگەر اعا تاعى دا كەزەكتى ساپارعا بەت الدى.

24.kz