ەلدەن ەرەك: الماتى بۇدان بىلاي كولىك سۋبسيدياسىنىڭ تالاپتارىن ءوزى بەكىتەدى

  الماتى. KAZINFORM - الماتىدا قالالىق ءماسليحاتتىڭ كەزەكتى XIX سەسسياسى ءوتىپ جاتىر.

سەسسيا بارىسىنداعى سۇراق-جاۋاپ كەزىندە الماتى قالاسى اكىمىنىڭ ورىنباسارى اسقار ءامرين جەرگىلىكتى تاسىمالداۋشى كومپانيالاردى سۋبسيديالاۋ ماسەلەسىنە پىكىر ءبىلدىردى.

ونىڭ ايتۋىنشا، قالاداعى تاسىمالداۋشىلاردى سۋبسيديالاۋ ەرەجەلەرى مەن ءادىسناماسى مينيسترلىك تاراپىنان بەكىتىلگەن.

ءبىراق جاۋاپتى ۆەدومستوۆونىڭ ەرەجەسى قالا تالاپتارىنا سايكەس كەلە بەرمەيدى.

- وسى جىلى جالپى سۋبسيديا سوماسى - 96 ميلليارد تەڭگە. 23 اۆتوبۋس پاركى ءۇشىن بۇل وتە ۇلكەن قارجى. ول 2022 -جىلى- اق بەلگىلى بولعان. سول كەزدەن بەرى نە ىستەدىك؟ سۋبسيديا رەسپۋبليكالىق ەمەس، جەرگىلىكتى بيۋدجەتتەن بەرىلەتىندىكتەن جاڭادان قۇرىلعان كولىك مينيسترلىگىمەن بايلانىستا بولدىق. ماجىلىسكە ءبىر اي بۇرىن وسى ماسەلەمەن باردىم. زاڭ جوباسى سەناتقا جىبەرىلدى. ەندى جەرگىلىكتى قوعامدىق كولىكتى سۋبسيديالاۋ ەرەجەسىن الماتى قالاسىنىڭ ءماسليحاتى بەكىتەتىن بولادى. مۇنداي تاجىريبە ەش جەردە جوق. تەك الماتى قالاسىندا ءبىز ءوزىمىز سۋبسيديا ەرەجەلەرىن بەكىتەتىن بولامىز، - دەدى الماتى اكىمىنىڭ ورىنباسارى اسقار ءامرين.

سونداي- اق اسقار ءامرين اتالمىش زاڭ جوباسى قابىلدانسا، كەلەر جىلدىڭ قاراجاتىن قالا تالاپتارىنا ساي بەكىتۋدى جوسپارلاپ وتىرعانىن اتاپ ءوتتى.

- ءبىز الماتى اگلومەراتسياسىنىڭ تەرەڭدىگىن كەڭەيتىپ جاتىرمىز. وتكەن جىلى اگلومەراتسياعا دەيىن 50 شاقىرىم جەرگە 10 جاڭا باعىت اشتىق. بيىل تاعى 20 باعىت اشساق دەيمىز. ەگەر وسى باعىتتاردى ەنگىزىپ، سۋبسيدياعا اقشا بولەتىن بولساق، كۇندە قالاعا كىرەتىن 450 مىڭعا جۋىق كولىكتىڭ سانى ازايادى. ونىڭ بارلىعى جەرگىلىكتى بيۋدجەت ەسەبىنەن جۇرگىزىلەدى. وسى ايدا سەنات وتىرىسى ءوتىپ، ودان كەيىن زاڭ جوباسى پرەزيدەنتتىڭ قول قويۋىنا جىبەرىلۋى كەرەك. زاڭ كۇشىنە ەنگەن سوڭ، ءبىز كەلەسى جىلدىڭ بيۋدجەتىن قالانىڭ تالاپتارىنا ساي بەكىتكىمىز كەلەدى،- دەدى ول.