ەلدە مادەني مۇرانى ساقتاۋدىڭ 2026-2028-جىلدارعا ارنالعان كەشەندى جوسپارى بەكىتىلدى
استانا. KAZINFORM - ۇكىمەت يۋنەسكو مەن يسەسكو اياسىندا مادەني مۇرانى ساقتاۋ جانە ىلگەرىلەتۋدىڭ 2026-2028-جىلدارعا ارنالعان كەشەندى جوسپارىن بەكىتتى.
بۇل تۋرالى ۇكىمەتتىڭ باسپا ءسوز قىزمەتى حابارلادى.
قازاقستان رەسپۋبليكاسى ۇكىمەتى يۋنەسكو جانە يسەسكو اياسىندا مادەني مۇرانى ساقتاۋ جانە ىلگەرىلەتۋدىڭ 2026-2028-جىلدارعا ارنالعان كەشەندى جوسپارىن بەكىتتى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى.
جوسپاردا تاريحي جانە مادەني ەسكەرتكىشتەردى ساقتاۋ، ماتەريالدىق ەمەس مادەني مۇرانى قولداۋ، مامانداردى دايارلاۋ جانە قازاقستاننىڭ وسى سالاداعى حالىقارالىق باعدارلامالار مەن باستامالارعا قاتىسۋىن كەڭەيتۋ جونىندەگى ناقتى شارالار كوزدەلگەن.
نەگىزگى مىندەتتەردىڭ قاتارىندا دۇنيەجۇزىلىك مۇرا نىساندارىن قورعاۋ ساپاسىن ارتتىرۋ، قازاقستاننىڭ مادەني قۇندىلىقتارىن حالىقارالىق دەڭگەيدە ىلگەرىلەتۋ، ساراپتامالىق جانە ءبىلىم بەرۋ بازاسىن دامىتۋ، سونداي-اق مادەني مۇرانى ساقتاۋ ىسىنە قوعامدى بەلسەندى تارتۋ ءىس-شارالارى بار.
ايتا كەتەلىك جاركەنت مەشىتى مەن ۆوزنەسەنسك شىركەۋى يۋنەسكونىڭ بۇكىلالەمدىك مۇرا نىساندارىنىڭ الدىن الا تىزىمىنە ەنگەن ەدى.