ەلدە مادەني مۇرانى قورعاۋ جونىندەگى مامانداردى دايارلاۋ كۇشەيتىلەدى
استانا. KAZINFORM - يۋنەسكو مەن يسەسكو اياسىندا مادەني مۇرانى ساقتاۋ جانە ىلگەرىلەتۋدىڭ 2026- 2028 -جىلدارعا ارنالعان كەشەندى جوسپارى شەڭبەرىندە مادەني مۇرانى قورعاۋ سالاسىندا ماماندار دايارلاۋدى كۇشەيتۋ كوزدەلگەن. بۇل تۋرالى ۇكىمەتتىڭ باسپا ءسوز قىزمەتى حابارلادى.
بۇل تۋرالى يۋنەسكو جانە يسەسكو ىستەرى جونىندەگى قازاقستان رەسپۋبليكاسىنىڭ ۇلتتىق كوميسسياسى جانىنداعى ماتەريالدىق ەمەس مادەني مۇرانى قورعاۋ كوميتەتى ءتوراعاسىنىڭ ورىنباسارى رۋستام مۇزافاروۆ ايتىپ بەردى.
— كەشەندى جوسپار تاعى ءبىر وتە ماڭىزدى ماسەلەنى - مۇرانى قورعاۋ سالاسىنىڭ ماماندارىن دايارلاۋدى كوزدەيدى. سوڭعى جىلدارى بۇل باعىتتا يۋنەسكو ايتارلىقتاي قولداۋ كورسەتىپ كەلەدى. ءبىز ماماندارىمىزدى، ەڭ الدىمەن، وبلىستىق جانە اۋداندىق دەڭگەيدە دايارلاپ جاتىرمىز، ويتكەنى مادەني مۇرا ۇلكەن قالالاردا عانا ءومىر سۇرمەيدى، ونى سەزىنىپ، قادىرىن تۇسىنەتىن جەرلەردە ءومىر سۇرەدى، — دەپ اتاپ ءوتتى عالىم.
ايتا كەتەلىك ەلدە مادەني مۇرانى ساقتاۋدىڭ 2026- 2028 -جىلدارعا ارنالعان كەشەندى جوسپارى بەكىتىلدى.